ഇന്ത്യൻ അതിർത്തിയിലെ മൂന്ന് കമാൻഡ് ജനറൽമാർക്ക് ഉന്നത തസ്തികകളിലേക്ക് സ്ഥാനക്കയറ്റം നൽകി ഷി ജിൻപിംഗ്

ചൈനീസ് പ്രസിഡന്റ് ഷി ജിൻ പിങ് ചരിത്രപരമായ മൂന്നാം തവണയും അധികാരമേറ്റതിന് ശേഷം, ഇന്ത്യൻ അതിർത്തിയിൽ സേവനം ചെയ്യുന്ന ചൈനീസ് സൈന്യത്തിലെ 3 ജനറൽമാരെ ഉയർന്ന തസ്തികകളിലേക്ക് സ്ഥാനക്കയറ്റം നൽകി. ഇന്ത്യയുടെ അതിർത്തിയിലുള്ള വെസ്റ്റേൺ തിയറ്റർ കമാൻഡിൽ സൈന്യത്തെ നയിക്കുന്നതിൽ പ്രധാന പങ്കുവഹിച്ച മൂന്ന് പീപ്പിൾസ് ലിബറേഷൻ ആർമി (പിഎൽഎ) ജനറൽമാർക്ക് സ്ഥാനക്കയറ്റം ലഭിച്ചു.

നിലവിൽ വിരമിക്കുന്ന സൂ ഖിലിയാങ്ങിന് പകരമായി സെൻട്രൽ മിലിട്ടറി കമ്മിഷന്റെ (സിഎംസി) പുതിയ വൈസ് ചെയർമാനായി 65 കാരനായ ജനറൽ ഹെ വെയ്‌ഡോംഗ് തിരഞ്ഞെടുക്കപ്പെട്ടു. അദ്ദേഹം ഒരിക്കലും സിഎംസിയിൽ സേവനമനുഷ്ഠിക്കാതെ വൈസ് ചെയർമാനാകുന്നു എന്നതാണ് പ്രത്യേകത.

ചൈനീസ് പ്രസിഡന്റിന്റെ അടുത്ത സഹായിയായ ജനറൽ ഷാങ് യൂക്‌സിയ (72) മറ്റൊരു ടേമും മറ്റൊരു വൈസ് ചെയർമാനായും ഒന്നാം റാങ്കിംഗിലും തുടരും. വിരമിക്കൽ പ്രായം കഴിഞ്ഞിട്ടും അദ്ദേഹം തൽസ്ഥാനത്ത് തുടരുകയാണ്.ഇതോടൊപ്പം പാർട്ടിയുടെ പുതിയ സെൻട്രൽ കമ്മിറ്റിയിലെ 205 അംഗങ്ങളിൽ ഒരാളായി 60 കാരനായ ജനറൽ സൂ ക്വിലിംഗിനെ നിയമിച്ചു.

മറ്റ് നിയമനങ്ങളിൽ, വിരമിക്കൽ പ്രായത്തിന് മുകളിലുള്ള ചൈനയുടെ വിദേശകാര്യ മന്ത്രി വാങ് യി (69) പൊളിറ്റ് ബ്യൂറോയിലേക്ക് സ്ഥാനക്കയറ്റം നൽകി. പാർട്ടിയുടെ വിദേശകാര്യ കമ്മീഷൻ ഡയറക്ടറായി വിരമിക്കുന്ന യാങ് ജിയേച്ചിക്ക് പകരം അടുത്ത ഉന്നത നയതന്ത്രജ്ഞനായി യി എത്താനും സാധ്യതയുണ്ട്. പ്രസിഡന്റ് ജിൻപിങ്ങിന്റെ മറ്റൊരു അടുത്ത സഹായിയും യുഎസിലെ നിലവിലെ പ്രതിനിധിയും അദ്ദേഹത്തിന്റെ മുൻ പ്രോട്ടോക്കോൾ മേധാവിയുമായ ക്വിൻ ഗാംഗിനെയും കേന്ദ്ര കമ്മിറ്റിയിലേക്ക് നിയമിച്ചു.