ബിജെപി രഥയാത്ര നടത്തിയത് അധികാരത്തിനുവേണ്ടിയായിരുന്നെങ്കിൽ കോൺഗ്രസിന്റെ ഭാരത് ജോഡോ യാത്ര സത്യത്തിന് വേണ്ടി: കനയ്യ കുമാർ

രാഹുൽ ഗാന്ധി നയിക്കുന്ന കോൺഗ്രസിന്റെ പുനരുജ്ജീവന പദ്ധതിയായ ഭാരത് ജോഡോ യാത്രയിൽ ബിജെപിക്കെതിരെ രൂക്ഷ പ്രതികരണവുമായി കനയ്യ കുമാർ. 1990-ൽ ബിജെപി രാജ്യമാകെ രഥയാത്ര നടത്തിയത് അധികാരത്തിനുവേണ്ടിയായിരുന്നെങ്കിൽ കോൺഗ്രസിന്റെ ഭാരത് ജോഡോ യാത്ര സത്യത്തിനുവേണ്ടിയാണെന്ന് അദ്ദേഹം മാധ്യമങ്ങളോട് പറഞ്ഞു.

കോൺഗ്രസ് നടത്തുന്ന ഈ പ്രചാരണം രാഷ്ട്രീയം മാത്രമല്ലെന്നും രാജ്യത്തെ എല്ലാവർക്കും വേണ്ടിയുള്ളതാണെന്ന് കാണിക്കാനുള്ള ശ്രമം കൂടിയാണെന്നും അദ്ദേഹം കൂട്ടിച്ചേർത്തു. 1990-ൽ എൽ കെ അദ്വാനി നടത്തിയ യാത്രയുടെ പ്രതികൂല പ്രത്യാഘാതങ്ങൾ താൻ പറയുന്നില്ല.

ഇന്ത്യ ഇപ്പോഴും അതിന്റെ ദോഷഫലങ്ങൾ അനുഭവിക്കുകയാണെന്നും കനയ്യ കുമാർ കൂട്ടിച്ചേർത്തു. യാത്രയ്ക്ക് സാമൂഹികവും രാഷ്ട്രീയവും സാമ്പത്തികവുമായ മൂന്ന് പ്രധാന വശങ്ങളുണ്ടെന്ന് അദ്ദേഹം പറഞ്ഞു.

“കന്യാകുമാരി മുതൽ കാശ്മീർ വരെ നടക്കാൻ അവസരം ലഭിക്കുന്നത് ഏതൊരു ഇന്ത്യക്കാരനും ഭാഗ്യമാണ്. ആളുകളെ കാണും, വൈവിധ്യമാർന്ന സംസ്കാരങ്ങൾ, വസ്ത്രങ്ങൾ, ഭാഷകൾ എന്നിവ അനുഭവിക്കാം. രാജ്യം ഭൂമിശാസ്ത്രപരമായും ചരിത്രപരമായും വിഭജിച്ചിട്ടില്ല. എന്നാൽ നിലവിലെ സർക്കാരിന്റെ ഉദ്ദേശ്യങ്ങളും നയങ്ങളും നോക്കുമ്പോൾ, സമ്പന്നരും ദരിദ്രരും തമ്മിൽ വലിയ അന്തരമുണ്ട്” -കനയ്യ കുമാർ പറഞ്ഞു.