തുർക്കി-സിറിയ ഭൂചലനം; മരണസംഖ്യ 41,000 കവിഞ്ഞു
ഈ മാസം ആറിന് തുർക്കിയിലും സിറിയയിലും ഉണ്ടായ ഭൂചലനത്തിൽ മരിച്ചവരുടെ എണ്ണം 41,000 കടന്നതായി അന്താരാഷ്‌ട്ര മാധ്യമങ്ങൾ റിപ്പോർട്ട് ചെയ്യുന്നു. വിനാശകരമായ ഭൂകമ്പത്തിൽ 41,000-ലധികം ആളുകൾക്ക് ജീവൻ നഷ്ടപ്പെട്ടു.
അതിൽ 1,414 മരണങ്ങൾ സിറിയൻ ഗവൺമെന്റിന്റെ ആരോഗ്യ മന്ത്രാലയവും 4,400 മരണങ്ങൾ വിമതരുടെ നിയന്ത്രണത്തിലുള്ള വടക്കുപടിഞ്ഞാറൻ സിറിയയിൽ യുഎൻ മാനുഷിക ഏജൻസിയും റിപ്പോർട്ട് ചെയ്തു.
“ഇരട്ട ഭൂചലനത്തിൽ 35,418 പേർ മരിച്ചു, 13,208 പേർ പരിക്കേറ്റു ഞങ്ങളുടെ ആശുപത്രികളിൽ ഇപ്പോഴും ചികിത്സയിലാണ്,” തുർക്കി പ്രസിഡന്റ് റജബ് തയ്യിബ് എർദോഗൻ പറഞ്ഞതായി അനദോലു വാർത്താ ഏജൻസി ഉദ്ധരിച്ചു.
195,962 പേരെ ഒഴിപ്പിച്ചതായി തുർക്കി ഡിസാസ്റ്റർ ആൻഡ് എമർജൻസി മാനേജ്‌മെന്റ് പ്രസിഡൻസി (എഎഫ്‌എഡി) അറിയിച്ചു.ഇതുവരെ നൂറോളം രാജ്യങ്ങൾ സഹായം വാഗ്ദാനം ചെയ്തിട്ടുണ്ടെന്നും ആകെ 9,046 വിദേശ ഉദ്യോഗസ്ഥർ ദുരന്തമേഖലയിൽ പ്രവർത്തിക്കുന്നുണ്ടെന്നും തുർക്കി വിദേശകാര്യ മന്ത്രാലയം അറിയിച്ചു.
