‘ഇറാനെതിരെ പുതിയ യുദ്ധത്തിന് കളമൊരുക്കാൻ ഇസ്രായേൽ’; ഫ്ലൈദുബായ് സംഭവത്തിൽ ആരോപണം

അമേരിക്കയെ ഇറാനെതിരായ മറ്റൊരു സൈനിക സംഘർഷത്തിലേക്ക് തള്ളിവിടുന്നതിനായി ഇസ്രായേൽ ആസൂത്രണം ചെയ്ത ‘ഫോൾസ് ഫ്ലാഗ്’ നീക്കമാണ് ഫ്ലൈദുബായ് വിമാനത്തിലെ ആക്രമണ സംഭവമെന്ന് ഇറാനിയൻ മാധ്യമങ്ങളുടെ ആരോപണം. യുഎഇയിലെ ദുബായിൽ നിന്ന് ഇസ്രായേലിലെ ടെൽ അവീവിലേക്ക് പോയ വിമാനത്തിലുണ്ടായ സംഭവങ്ങൾക്ക് പിന്നിൽ ഇസ്രായേൽ ഇന്റലിജൻസിനും പ്രധാനമന്ത്രി ബെഞ്ചമിൻ നെതന്യാഹുവിനും പങ്കുണ്ടെന്ന വാദമാണ് ഇറാനിയൻ ഔദ്യോഗിക മാധ്യമമായ പ്രസ് ടിവി ഉന്നയിക്കുന്നത്.

മേഖലയിൽ പുതിയ സൈനിക സംഘർഷത്തിന് സാഹചര്യമൊരുക്കുകയും യുഎസ് പ്രസിഡന്റ് ഡൊണാൾഡ് ട്രംപിന്റെ സൈനിക പിന്തുണ ഉറപ്പാക്കുകയുമാണ് ഇസ്രായേലിന്റെ ലക്ഷ്യമെന്നാണ് ഇറാനിയൻ മാധ്യമങ്ങളുടെ ആരോപണം. വിമാനത്തിലെ ആക്രമണവുമായി ബന്ധപ്പെട്ട് സഹപൈലറ്റിന് ഇറാനുമായി ബന്ധമുണ്ടെന്ന തരത്തിലുള്ള പ്രചാരണങ്ങൾ അടിസ്ഥാനരഹിതമാണെന്നും ഇറാനെ സംഭവത്തിൽ പ്രതിയാക്കാനുള്ള ശ്രമത്തിന്റെ ഭാഗമാണെന്നും പ്രസ് ടിവി റിപ്പോർട്ട് ചെയ്തു.

നെതന്യാഹുവിനെതിരായ ആഭ്യന്തര രാഷ്ട്രീയ സമ്മർദങ്ങളിൽനിന്നും തെരഞ്ഞെടുപ്പ് ഭീഷണികളിൽനിന്നും ശ്രദ്ധതിരിക്കാനുള്ള നീക്കമാണിതെന്നും റിപ്പോർട്ടിൽ ആരോപിക്കുന്നു. വിമാനം ഹൈജാക്ക് ചെയ്യാനോ തകർക്കാനോ ശ്രമിച്ച സംഭവത്തിന്റെ ഉത്തരവാദിത്വം ഇറാന്റെ മേൽ ചുമത്താനുള്ള സാഹചര്യം സൃഷ്ടിക്കുകയായിരുന്നു ലക്ഷ്യമെന്നും ഇറാനിയൻ മാധ്യമങ്ങൾ വാദിക്കുന്നു.

174 യാത്രക്കാരുമായി സർവീസ് നടത്തിയ ഫ്ലൈദുബായ് FZ1073 വിമാനത്തിന്റെ കോക്ക്പിറ്റിൽ സഹപൈലറ്റ് അക്രമം നടത്തിയതിനെ തുടർന്ന് വിമാനം സൗദി അറേബ്യയിലെ തബൂക്കിൽ അടിയന്തരമായി ഇറക്കിയിരുന്നു. സംഭവത്തിന് പിന്നാലെ സഹപൈലറ്റിന് ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സുമായി (ഐആർജിസി) ബന്ധമുണ്ടാകാമെന്ന് യുഎസ് പ്രസിഡന്റ് ഡൊണാൾഡ് ട്രംപ് സൂചന നൽകിയിരുന്നു.

എന്നാൽ ഇസ്രായേൽ ആസൂത്രിതമായി നടത്തിയ ‘ഫോൾസ് ഫ്ലാഗ്’ നീക്കമാണെന്ന ഇറാന്റെ ആരോപണങ്ങൾക്ക് ഇതുവരെ കൃത്യമായ തെളിവുകൾ പുറത്തുവന്നിട്ടില്ല. വിമാനത്തിനുള്ളിൽ നടന്ന സംഭവത്തിന്റെ സാഹചര്യങ്ങളും ആക്രമണത്തിന് പിന്നിലെ ഉദ്ദേശ്യവും സംബന്ധിച്ച അന്വേഷണം തുടരുകയാണ്.

സംഭവവുമായി ബന്ധപ്പെട്ട് തീവ്രവാദ ബന്ധമോ മുൻകൂർ ആസൂത്രണമോ ഉണ്ടായിരുന്നോ എന്നതടക്കമുള്ള കാര്യങ്ങൾ അന്വേഷണ ഏജൻസികൾ പരിശോധിച്ചുവരികയാണ്. യുഎഇ, ഇസ്രായേൽ, അമേരിക്കൻ സർക്കാരുകൾ ഇറാനിയൻ മാധ്യമങ്ങൾ ഉന്നയിച്ച ആരോപണങ്ങളിൽ ഇതുവരെ ഔദ്യോഗിക പ്രതികരണം നടത്തിയിട്ടില്ല.

അതിനിടെ സുരക്ഷാ കാരണങ്ങൾ ചൂണ്ടിക്കാട്ടി ഇസ്രായേലിലേക്കുള്ള സർവീസുകൾ ഫ്ലൈദുബായ് താൽക്കാലികമായി നിർത്തിവച്ചിട്ടുണ്ട്. അന്വേഷണ ഏജൻസികളുടെ ഔദ്യോഗിക കണ്ടെത്തലുകൾ പുറത്തുവരുന്നതോടെ മാത്രമേ സംഭവത്തിന്റെ യഥാർഥ പശ്ചാത്തലം കൂടുതൽ വ്യക്തമാകൂ.