വൈദ്യുതി കരാറുകളിൽ കോടികളുടെ അഴിമതിയെന്ന് സിപിഎം; ജുഡീഷ്യൽ അന്വേഷണം ആവശ്യപ്പെട്ടു

യുഡിഎഫ് സർക്കാരിന്റെ രണ്ട് വൈദ്യുതി കരാറുകളിൽ കോടികളുടെ അഴിമതി നടന്നതായി ആരോപിച്ച് സിപിഎം സംസ്ഥാന സെക്രട്ടേറിയറ്റ്. വി.ഇ.എച്ച് ഗ്ലോബൽ ഇന്ത്യയുമായി ചേർന്ന് കാറ്റാടി വൈദ്യുതി യൂണിറ്റിന് 11 രൂപ നിരക്കിൽ വാങ്ങിയതിലും ഹിമാചൽ പ്രദേശിൽനിന്ന് എനർജി എക്സ്ചേഞ്ച് നിരക്കിനേക്കാൾ ഉയർന്ന വിലയ്ക്ക് 900 മെഗാവാട്ട് വൈദ്യുതി വാങ്ങിയതിലും ക്രമക്കേട് നടന്നിട്ടുണ്ടെന്നാണ് പുറത്തുവന്ന രേഖകൾ വ്യക്തമാക്കുന്നതെന്ന് പാർട്ടി പ്രസ്താവനയിൽ ആരോപിച്ചു. കരാറുകൾ സംസ്ഥാനത്തിന് വൻ സാമ്പത്തിക നഷ്ടമുണ്ടാക്കിയതായി മാധ്യമങ്ങളും റിപ്പോർട്ട് ചെയ്തിട്ടുണ്ടെന്നും സിപിഎം ചൂണ്ടിക്കാട്ടി.
ടെൻഡറോ റെഗുലേറ്ററി കമ്മീഷന്റെ അനുമതിയോ നിയമ-ധന വകുപ്പുകളുടെ പരിശോധനയോ ഇല്ലാതെയാണ് മുഖ്യമന്ത്രി നേരിട്ട് ഉത്തരവുകൾ നൽകിയതെന്നും സിപിഎം ആരോപിച്ചു. വിവിധ വകുപ്പുകൾ മുഖ്യമന്ത്രി തന്നെ കൈവശം വെച്ചത് അഴിമതിക്ക് വഴിയൊരുക്കാനാണെന്ന സംശയം ബലപ്പെടുന്നതായും പ്രസ്താവനയിൽ പറഞ്ഞു.
സർക്കാർ അധികാരത്തിലെത്തി ആറുമാസം തികയുംമുമ്പ് ഉയർന്നുവന്ന ഗുരുതരമായ ആരോപണങ്ങളിൽ സമഗ്രമായ ജുഡീഷ്യൽ അന്വേഷണം നടത്തണമെന്നും യഥാർഥ വസ്തുതകൾ പുറത്തുകൊണ്ടുവരണമെന്നും സിപിഎം ആവശ്യപ്പെട്ടു. കുറ്റക്കാർക്കെതിരെ ശക്തമായ നടപടി സ്വീകരിക്കണമെന്നും സംസ്ഥാന സെക്രട്ടേറിയറ്റ് പ്രസ്താവനയിലൂടെ ആവശ്യപ്പെട്ടു.


