അല്ലാഹു പാക്കിസ്ഥാനെ സൃഷ്ടിച്ചുവെങ്കിൽ അതിന്റെ വികസനവും സമൃദ്ധിയും അള്ളാഹു പരിപാലിക്കും: പാകിസ്ഥാൻ ധനമന്ത്രി
പാകിസ്ഥാൻ അതീവ വഷളായിക്കൊണ്ടിരിക്കുന്ന സാമ്പത്തിക പ്രതിസന്ധിയുമായി പൊരുതുമ്പോൾ, ധനമന്ത്രി മുഹമ്മദ് ഇസ്ഹാഖ് ദാർ സമ്പദ്‌വ്യവസ്ഥയെ പുനരുജ്ജീവിപ്പിക്കാനുള്ള ഉത്തരവാദിത്തം അല്ലാഹുവിന്റെ മേൽ ചുമത്തി. അള്ളാഹു പാകിസ്ഥാനിൽ ഐശ്വര്യം തിരികെ കൊണ്ടുവരട്ടെയെന്ന് സർക്കാർ പ്രാർത്ഥിക്കുകയാണെന്നും ഇസ്ഹാഖ് ദാർ പറഞ്ഞു.
രാജ്യ തലസ്ഥാനമായ ഇസ്ലാമാബാദിൽ ഗ്രീൻ ലൈൻ എക്‌സ്പ്രസ് ട്രെയിൻ സർവീസിന്റെ ഉദ്ഘാടന പരിപാടിയിൽ സംസാരിക്കുകയായിരുന്നു പാകിസ്ഥാൻ മുസ്ലീം ലീഗ്-നവാസ് (പിഎംഎൽ-എൻ) മുതിർന്ന നേതാവ്. ഇസ്ലാമിന്റെ പേരിൽ സ്ഥാപിതമായതിനാൽ പാകിസ്ഥാൻ മുന്നേറുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.
പ്രധാനമന്ത്രി ഷെഹ്ബാസ് ഷെരീഫിന്റെ നേതൃത്വത്തിൽ പാക്കിസ്ഥാന്റെ അവസ്ഥ മെച്ചപ്പെടുത്താൻ തങ്ങൾ പരമാവധി ശ്രമിക്കുന്നുണ്ടെന്ന് ധനമന്ത്രി പറഞ്ഞു. നിലവിലെ ഭരണകൂടം ഇമ്രാൻ ഖാന്റെ സർക്കാരിൽ നിന്ന് നിരവധി പ്രശ്‌നങ്ങൾ പാരമ്പര്യമായി സ്വീകരിച്ചിട്ടുണ്ടെന്നും അവ പരിഹരിക്കാൻ രാപ്പകലില്ലാതെ പ്രവർത്തിക്കുന്നുണ്ടെന്നും തങ്ങളുടെ മുൻഗാമികളെ കുറ്റപ്പെടുത്തി ഇഷാഖ് ദാർ പറഞ്ഞു.
മുൻ പ്രധാനമന്ത്രി നവാസ് ഷെരീഫിന്റെ 2013-2017 ഭരണകാലത്ത് സമ്പദ്‌വ്യവസ്ഥ ശക്തമായിരുന്നുവെന്ന് അദ്ദേഹം അവകാശപ്പെട്ടു. നവാസ് ഷെരീഫിന്റെ ഭരണകാലത്ത് പാകിസ്ഥാൻ സ്റ്റോക്ക് എക്‌സ്‌ചേഞ്ച് ദക്ഷിണേഷ്യയിലെ ഏറ്റവും മികച്ച പ്രകടനം നടത്തുന്ന മൂലധന വിപണിയായിരുന്നുവെന്നും ആഗോളതലത്തിൽ അഞ്ചാം സ്ഥാനത്തായിരുന്നുവെന്നും അന്താരാഷ്ട്ര സ്ഥാപനങ്ങൾ ഇതിലേക്ക് കണ്ണുവെച്ചിട്ടുണ്ടെന്നും ഡാർ പറയുന്നു.
പിഎംഎൽ-എൻ ഭരണത്തെ അട്ടിമറിച്ച “പനാമ സാഗ”, കൂടാതെ കഴിഞ്ഞ അഞ്ച് വർഷങ്ങളിൽ പാകിസ്ഥാൻ അഭിമുഖീകരിക്കേണ്ടി വന്ന മറ്റ് പ്രശ്‌നങ്ങളും ഇപ്പോൾ രാജ്യത്ത് സ്വാധീനം ചെലുത്തുന്നുവെന്ന് അദ്ദേഹം അവകാശപ്പെട്ടു. നവാസിന്റെ കാലത്ത് പാകിസ്ഥാൻ വളർച്ചയുടെ പാതയിലായിരുന്നു, പക്ഷേ അത് പാളം തെറ്റി. “കഴിഞ്ഞ അഞ്ച് വർഷമായി രാജ്യം അനുഭവിച്ച നാശം ആളുകൾക്ക് കാണാനാകും, മുമ്പ് ആരാണ് നൽകിയതെന്ന് അവർക്കറിയാം,” അദ്ദേഹം കൂട്ടിച്ചേർത്തു.
