ഉപതെരഞ്ഞെടുപ്പില്‍ ചാണ്ടി ഉമ്മൻ ചരിത്ര വിജയം നേടും; പ്രവചനവുമായി സഹോദരി അച്ചു ഉമ്മൻ
പുതുപ്പള്ളി ഉപതെരഞ്ഞെടുപ്പിൽ യുഡിഎഫിനുവേണ്ടി മത്സരിക്കുന്ന ചാണ്ടി ഉമ്മന്റെ വിജയം പ്രവചിച്ച് സഹോദരി അച്ചു ഉമ്മൻ രംഗത്തെത്തി. ഉപതെരഞ്ഞെടുപ്പില്‍ ചാണ്ടി ഉമ്മൻ ചരിത്ര വിജയം നേടുമെന്നും ചാണ്ടി ഉമ്മൻ എന്ന രാഷ്ട്രീയക്കാരന് നൽകിയ അംഗീകാരമാണ് യുഡിഎഫ് സ്ഥാനാർത്ഥിത്വമെന്ന് അച്ചു ഉമ്മൻ പറഞ്ഞു.
അതേസമയം, പുതുപ്പള്ളി മണ്ഡലത്തിൽ വികസന മുരടിപ്പെന്ന് നേരത്തെ ആരോപണം ഉയർന്നിരുന്നു. ഈ പ്രചാരണങ്ങളോടും അച്ചു പ്രതികരിച്ചു. വികസനവും കരുതലും ഒരുമിച്ച് കൊണ്ടുപോയത് കൊണ്ടാണ് 53 വർഷം ഉമ്മൻചാണ്ടി പുതുപ്പള്ളിയെ പ്രതിനിധീകരിച്ചതെന്നായിരുന്നു മറുപടി. ഉമ്മൻചാണ്ടി ജീവിച്ചിരുന്ന കാലത്ത് ഒരുപാട് നുണകൾ കൊണ്ട് വേട്ടയാടപ്പെട്ടിരുന്നു.
എല്ലാ കുപ്രചരണങ്ങൾക്കും പുതുപ്പള്ളിയിലെ ജനം മറുപടി നൽകുമെന്ന് അച്ചു ഉമ്മൻ പറഞ്ഞു. ഉമ്മൻ ചാണ്ടിയുടെ അന്ത്യ യാത്രയിൽ വന്ന ജനങ്ങളെ ആരും വിളിച്ചിട്ട് വന്നതല്ല. ഉമ്മൻചാണ്ടിയെ ആക്ഷേപിക്കാനാണ് ശ്രമമെങ്കിൽ അതിന് ജനങ്ങൾ തന്നെ മറുപടി നൽകുമെന്ന് അച്ചു ഉമ്മൻ കൂട്ടിച്ചേർത്തു.
