കുസൃതിയുടെ ഭാഗമായി സ്‌കൂളിൽ സഹപാഠികൾ കുരുമുളക് സ്‌പ്രേ ചെയ്തു, 11 വിദ്യാർഥിനികൾ ആശുപത്രിയിൽ
നോർത്ത് ഗോവയിലെ ബിച്ചോളിമിലെ ഹയർസെക്കൻഡറി സ്‌കൂളിൽ പഠിക്കുന്ന 11 പെൺകുട്ടികളെ ഇന്ന് ചില സഹവിദ്യാർത്ഥികൾ പെപ്പർ സ്‌പ്രേ ഉപയോഗിച്ചതിനെ തുടർന്ന് ആശുപത്രിയിൽ പ്രവേശിപ്പിച്ചതായി മുതിർന്ന പോലീസ് ഉദ്യോഗസ്ഥൻ പറഞ്ഞു. വിദ്യാർഥിനികൾ ക്ലാസ് മുറിക്കുള്ളിലിരിക്കുമ്പോഴായിരുന്നു സംഭവം.
“സ്‌കൂൾ മാനേജ്‌മെന്റിൽ നിന്ന് ലഭിച്ച പരാതി പ്രകാരം, മറ്റൊരു കൂട്ടം വിദ്യാർത്ഥികൾ കുരുമുളക് സ്‌പ്രേ പ്രയോഗിച്ചപ്പോൾ ചില പെൺകുട്ടികൾക്ക് അസ്വസ്ഥതയും ശ്വാസതടസ്സവും അനുഭവപ്പെട്ടു,” ഉദ്യോഗസ്ഥർ പറഞ്ഞു. പതിനൊന്ന് പെൺകുട്ടികളെ ആദ്യം ബിക്കോളിമിലെ കമ്മ്യൂണിറ്റി ഹെൽത്ത് സെന്ററിലേക്ക് റഫർ ചെയ്തിരുന്നു, അവരിൽ മൂന്ന് പേരെ പിന്നീട് മപുസ ടൗണിലെ ജില്ലാ ആശുപത്രിയിൽ പ്രവേശിപ്പിച്ചു,” അദ്ദേഹം പറഞ്ഞു.
അവിടെ പ്രവേശിപ്പിക്കപ്പെട്ട എല്ലാ വിദ്യാർത്ഥികളുടെയും നില തൃപ്തികരമാണെന്ന് ജില്ലാ ആശുപത്രിയിലെത്തിയ ബിച്ചോലിം എംഎൽഎ ഡോ ചന്ദ്രകാന്ത് ഷെട്ടി പറഞ്ഞു. രണ്ടുപേരൊഴികെ ഭൂരിപക്ഷം വിദ്യാർഥികൾക്കും ഉടൻ ഡിസ്ചാർജ് നൽകുമെന്നും അദ്ദേഹം പറഞ്ഞു.
സംഭവത്തിൽ അച്ചടക്ക സമിതി രൂപീകരിച്ച് അന്വേഷണം നടത്താൻ സ്‌കൂൾ മാനേജ്‌മെന്റിനോട് പോലീസ് ആവശ്യപ്പെട്ടിട്ടുണ്ടെന്നും നിയമസഭാംഗം ചൂണ്ടിക്കാട്ടി. ചില വിദ്യാർത്ഥികൾ ക്ലാസ് മുറിക്ക് പുറത്ത് നിന്ന് ജനലിലൂടെ കുരുമുളക് സ്‌പ്രേ ചെയ്തതായി പ്രാഥമിക അന്വേഷണത്തിൽ വ്യക്തമായിട്ടുണ്ട്.
മോശം പെരുമാറ്റത്തിന് സ്‌കൂളിൽ നിന്ന് ഇതിനകം നാല് വിദ്യാർത്ഥികളെ സസ്‌പെൻഡ് ചെയ്തതായി മാനേജ്‌മെന്റ് പോലീസിനോട് പറഞ്ഞതായി എംഎൽഎ കൂട്ടിച്ചേർത്തു. ഗോവ പ്രദേശ് കോൺഗ്രസ് കമ്മിറ്റി പ്രസിഡന്റ് അമിത് പട്കറും പാർട്ടി എംഎൽഎ കാർലോസ് ഫെരേരയും ജില്ലാ ആശുപത്രിയിൽ വിദ്യാർത്ഥികളെ സന്ദർശിച്ചു. വിദ്യാർത്ഥികൾ ഇത്തരത്തിലുള്ള മോശം പെരുമാറ്റം കാണിക്കുന്നത് ദൗർഭാഗ്യകരമാണെന്നും അദ്ദേഹം മാധ്യമപ്രവർത്തകരോട് പറഞ്ഞു.
