നിങ്ങൾ രാത്രിയാകുമ്പോൾ മാത്രം ‘പ്രൊഡക്ടീവാകുന്നവരാണോ’? കാരണങ്ങൾ അറിയാം

പകൽ മുഴുവൻ മാറ്റിവെച്ച ജോലികളും വായനയും പ്ലാനിങ്ങുമെല്ലാം രാത്രി സമയത്ത് ചെയ്യാൻ കൂടുതൽ താൽപര്യം തോന്നുന്നവരുണ്ട്. ‘നൈറ്റ് പ്രൊഡക്ടിവിറ്റി’ എന്ന് വിശേഷിപ്പിക്കാവുന്ന ഈ ശീലം ശരീരത്തിന്റെ ജൈവഘടികാരം മുതൽ പകൽസമയത്തെ മാനസിക സമ്മർദം വരെയുള്ള വിവിധ ഘടകങ്ങളുമായി ബന്ധപ്പെട്ടിരിക്കാം.

പകൽ ഫോൺ കോളുകൾ, സന്ദേശങ്ങൾ, ജോലി, കുടുംബകാര്യങ്ങൾ, സോഷ്യൽ മീഡിയ തുടങ്ങിയ ഇടപെടലുകൾ കൂടുതലായിരിക്കും. രാത്രിയിൽ ഇവ കുറയുന്നതോടെ കൂടുതൽ ഏകാഗ്രതയോടെ ജോലി ചെയ്യാൻ സാധിക്കും. അതേസമയം, ദിവസത്തെ ഉത്തരവാദിത്തങ്ങൾ അവസാനിക്കുന്നതോടെ മാനസിക സമ്മർദം കുറയുന്നതും ശ്രദ്ധ വർധിക്കാൻ കാരണമാകാം.

ഓരോരുത്തരുടെയും സർക്കാഡിയൻ റിഥം വ്യത്യസ്തമാണ്. ചിലർക്ക് രാവിലെയും മറ്റു ചിലർക്ക് വൈകുന്നേരവും രാത്രിയിലുമാണ് കൂടുതൽ ഊർജവും ശ്രദ്ധയും അനുഭവപ്പെടുന്നത്. കൂടാതെ, പകൽ ലഭിക്കാത്ത ‘സ്വന്തം സമയം’ രാത്രി ലഭിക്കുന്നതും വായന, പഠനം, ഹോബികൾ തുടങ്ങിയവയ്ക്കായി സമയം ചെലവഴിക്കാൻ പ്രേരിപ്പിക്കാം.

എന്നാൽ രാത്രി കൂടുതൽ പ്രൊഡക്ടീവായി തോന്നുന്നു എന്ന കാരണത്താൽ ഉറക്കം സ്ഥിരമായി കുറയ്ക്കുന്നത് ആരോഗ്യകരമല്ല. മുതിർന്നവർക്ക് സാധാരണയായി 7–9 മണിക്കൂർ ഉറക്കം ആവശ്യമാണ്. മതിയായ ഉറക്കത്തിനും പ്രൊഡക്ടിവിറ്റിക്കുമിടയിൽ സന്തുലിതാവസ്ഥ പാലിക്കേണ്ടത് പ്രധാനമാണ്.