സോളോ ട്രക്കിങ് നിരോധിച്ച് നേപ്പാൾ; ഏപ്രില്‍ ഒന്ന് മുതല്‍ പ്രാബല്യത്തിൽ
നേപ്പാളില്‍ ഇനി മുതല്‍ ആർക്കും ഒറ്റയ്ക്ക് ട്രക്കിങ് നടത്താന്‍ സാധിക്കില്ല. സഞ്ചാരികൾക്ക് ആവശ്യമായ സുരക്ഷ മുന്‍ നിര്‍ത്തി ഏപ്രില്‍ ഒന്ന് മുതല്‍ രാജ്യത്ത് ട്രക്കിങ്ങിന് ഗൈഡിനെ നിര്‍ബന്ധമാക്കി.നേപ്പാള്‍ ടൂറിസം ബോര്‍ഡിന്റേതാണ് തീരുമാനം. ഏപ്രിൽ ഒന്ന് മുതൽ പുതിയ തീരുമാനം പ്രാബല്യത്തിൽ വരുമെന്ന് നേപ്പാൾ ടൂറിസം ബോർഡ് ഡയറക്ടർ മണിരാജ് ലാമിച്ചനെ അറിയിച്ചു.
”രാജ്യത്തെത്തുന്ന വിനോദ സഞ്ചാരികൾ തനിച്ച് ട്രക്കിങ് നടത്തുമ്പോൾ, പലപ്പോഴും വഴിതെറ്റുകയും സുരക്ഷിതമല്ലാത്ത സാഹചര്യങ്ങളില്‍ എത്തിപ്പെടുകയും ചെയ്യും. ഈ സാഹര്യത്തിലാണ് സോളോ ട്രക്കിങുകൾ നിരോധിക്കാനുള്ള തീരുമാനത്തിൽ ഞങ്ങൾ എത്തിയിരിക്കുന്നത്. ഏപ്രിൽ 1 മുതൽ, സാഹസിക വിനോദ സഞ്ചാരത്തിന് ഗൈഡുകൾ നിർബന്ധമാണ്-” ലാമിച്ചനെ പറഞ്ഞു.
നേപ്പാള്‍ ടൂറിസം ബോര്‍ഡിന്റെ കണക്കുകൾ പ്രകാരം 2019ൽ നേപ്പാളിൽ 50,000 വിനോദസഞ്ചാരികളാണ് ഗൈഡിന്റയോ മറ്റോ സഹായമില്ലാതെ ട്രെക്കിങ് നടത്തിയത്. റൂട്ട് പെർമിറ്റും ട്രെക്കേഴ്സ് ഇൻഫർമേഷൻ മാനേജ്മെന്റ് സിസ്റ്റം (TIMS) കാർഡും നേടിയാണ് ഈ വിനോദ സഞ്ചാരികൾ ട്രെക്കിങ് നടത്തിയത്.ട്രക്കേഴ്‌സ് ഇന്‍ഫര്‍മേഷന്‍ മനേജ്‌മെന്റ് സിസ്റ്റം കാര്‍ഡായിരുന്നു സാഹസിക സഞ്ചാരികള്‍ക്ക് ആവശ്യമായ ബേസിക് ട്രക്കിങ്ങ് പെര്‍മിറ്റ്. എന്നാല്‍ പുതിയ തീരുമാന പ്രകാരം ഗൈഡ് ഇല്ലാത്ത പെര്‍മിറ്റ് കാര്‍ഡുകള്‍ ടൂറിസം വകുപ്പ് നിരോധിച്ചിരിക്കുകയാണ്.
