ബോക്സ് ഓഫീസിൽ തകർന്ന് കങ്കണയുടെ തേജസ്

കങ്കണ റണാവത്ത് നായികയായ ഏറ്റവും പുതിയ ചിത്രം തേജസ് കഴിഞ്ഞ ദിവസമാണ് തീയേറ്ററുകളിൽ എത്തിയത്. ഇന്ത്യൻ എയർഫോഴ്സ് പൈലറ്റിൻ്റെ വേഷത്തിലാണ് കങ്കണ ഈ ചിത്രത്തിൽ അഭിനയിച്ചിരിക്കുന്നത്. എന്നാൽ ബോളിവുഡ് ബിഗ് സ്ക്രീനിൽ നിരാശ പടർത്തിക്കൊണ്ടാണ് ചിത്രത്തിൻ്റെ ആദ്യദിനം കടന്നുപോകുന്നത്.

കങ്കണ നേരിട്ടിറങ്ങി സിനിമയുടെ പ്രചരണ പരിപാടികൾ ഏറ്റെടുത്തു നടത്തിയെങ്കിലും അതൊന്നും കളക്ഷൻ റിപ്പോർട്ടിൽ പ്രതിഫലിച്ചിട്ടില്ല. ചിത്രത്തിൻ്റെ ആദ്യദിന കളക്ഷൻ റിപ്പോർട്ട് വന്നപ്പോൾ കങ്കണയുടെ വലിയ പരാജയ ചിത്രങ്ങളിൽ ഒന്നായി മാറുകയാണ് തേജസ് എന്നാണ് സൂചനകൾ. ആദ്യദിനം തേജസ് കാണാൻ തീയേറ്ററിൽ എത്തിയ പ്രേക്ഷകർ വളരെ കുറവായിരുന്നു എന്നാണ് തീയേറ്റർ റിപ്പോർട്ടുകൾ സൂചിപ്പിക്കുന്നത്. അതുകൊണ്ടുതന്നെ ആദ്യ ദിവസത്തെ ബോക്സ് ഓഫീസ് കളക്ഷൻ കാര്യത്തിലും നിരാശയായിരുന്നു ഫലം.

തേജസിൻ്റെ ആദ്യ ദിനത്തിലെ ബോക്സ് ഓഫീസ് കളക്ഷൻ വിവരങ്ങൾ പുറത്തുവരുമ്പോൾ SACNILC യുടെ റിപ്പോർട്ട് പ്രകാരം തേജസ് നേടിയത് 1.25 കോടി രൂപയാണ്. അണിയറ പ്രവർത്തകർ അദ്യ ദിനം ചിത്രം നേടുമെന്ന് പ്രതീക്ഷിച്ചതിലും വളരെ കുറവാണ് രേഖപ്പെടുത്തിയിരിക്കുന്നത്. ആദ്യ ദിനം ചിത്രം 2 3 കോടി കളക്ഷൻ നേടുമെന്നാണ് അണിയറ പ്രവർത്തകർ പ്രതീക്ഷിച്ചിരുന്നത്.

അനുഷുൽ ചൗഹാൻ, വരുൺ മിത്ര, ആശിഷ് വിദ്യാർത്ഥി, വിശാഖ് നായർ തുടങ്ങിയ താരനിരയാണ് തേജസിൽ അഭിനയിച്ചിരിക്കുന്നത്. പാകിസ്ഥാനിൽ പ്രവർത്തിക്കുന്ന ഒരു ഇന്ത്യൻ ചാരനെ രക്ഷിക്കാൻ ജീവൻ പണയം വച്ച് അവിടേക്ക് പോകുന്ന ഒരു എയർഫോഴ്സ് ഉദ്യോഗസ്ഥയുടെ വേഷമാണ് കങ്കണ തേജസ്സിൽ ചെയ്തിരിക്കുന്നത്. എന്നാൽ ചിത്രം കാണുമ്പോൾ ആവേശമോ രാജ്യസ്നേഹമോ ഉണർത്തുന്നില്ലെന്നാണ് പ്രേക്ഷകരുടെ അഭിപ്രായം.

ഇന്ത്യയിൽ മാത്രം 1300 സ്ക്രീനുകളിൽ ആണ് ചിത്രം റിലീസ് ചെയ്തത്. എന്നാൽ സമീപകാലത്ത് ഏറ്റവും വലിയ പരാജയ ചിത്രമായി തേജസ് മാറിയിരിക്കുന്നു എന്നാണ് ആദ്യദിനം തന്നെ പുറത്തുവരുന്ന സൂചനകൾ.
അതേസമയം, കഴിഞ്ഞ കുറച്ചു വർഷങ്ങൾ കങ്കണയെ സംബന്ധിച്ച് മികച്ചതായിരുന്നില്ല. വിവാദങ്ങളിൽ നിന്ന് വിവാദങ്ങളിലേക്ക് സഞ്ചരിക്കുന്ന നടി ഒന്നിന് പിറകെ ഒന്നായി നിരവധി പരാജയ ചിത്രങ്ങളാണ് പ്രേക്ഷകർക്ക് നൽകിയത്.