കഴിഞ്ഞ വർഷം ലോകത്ത് ഏറ്റവും കൂടുതൽ തവണ ഇന്റർനെറ്റ് നിർത്തിവെച്ചത് ജമ്മു കശ്മീരിലാണെന്ന് പഠനം

കഴിഞ്ഞ വർഷം ലോകത്ത് ഏറ്റവും കൂടുതൽ തവണ ഇന്റർനെറ്റ് നിർത്തിവെച്ചത് ജമ്മു കശ്മീരിലാണെന്ന് പഠനം. 24 തവണയാണ് ഇന്റർനെറ്റ് ഷട്ട്ഡൗൺ ഏർപ്പെടുത്തിയത് എന്നും, ഇത് ലോകത്തിലെ ഏറ്റവും ഉയർന്ന തോതാണ് എന്നുമാണ് വെർച്വൽ പ്രൈവറ്റ് നെറ്റ്‌വർക്ക് ദാതാവായ സർഫ്ഷാർക്കിന്റെ പഠന റിപ്പോർട്ടിൽ ഉള്ളത്.

2022ൽ ജമ്മു കശ്മീരിൽ 24 തവണ ഇന്ത്യൻ അധികാരികൾ ഇന്റർനെറ്റ് ഷട്ട്ഡൗൺ ചെയ്തിട്ടുണ്ട് എന്നും, രാജ്യത്തിന്റെ മറ്റ് ഭാഗങ്ങളിൽ 10 തവണ മാത്രമാണ് ഇത്തരം നടപടികൾ ഉണ്ടായതെന്നും കമ്പനി പറഞ്ഞു. ജമ്മു കശ്മീരിലെ ഇന്റർനെറ്റ് ഷട്ട്ഡൗൺ ഒരു സ്ഥിരം സംഭവമാണ് എന്നും സർഫ്ഷാർക്കിന്റെ പഠന റിപ്പോർട്ടിൽ പറയുന്നു.

2019 മുതൽ ജമ്മു കശ്മീരിന് പ്രത്യേക പദവി നൽകിയിരുന്ന ഭരണഘടനയുടെ ആർട്ടിക്കിൾ 370 റദ്ദാക്കിയതിന് ശേഷം ജമ്മു കശ്മീരിലെ നിവാസികൾ അഭൂതപൂർവമായ ഇന്റർനെറ്റ് നിയന്ത്രണങ്ങൾ നേരിടുന്നുണ്ടെന്ന് സർഫ്ഷാർക്ക് ചൊവ്വാഴ്ച പറഞ്ഞു. 2019 ഓഗസ്റ്റ് മുതൽ 2020 ജനുവരി വരെ പൂർണ്ണമായ ബ്ലാക്ക്ഔട്ട് അനുഭവപ്പെട്ടു, അതിനുശേഷം 2G ഇന്റർനെറ്റ് അനുവദിച്ചു. ഏകദേശം 18 മാസത്തിന് ശേഷമാണ് അധികൃതർ 4ജി സേവനങ്ങൾ പുനഃസ്ഥാപിച്ചത്.

ആഗോളതലത്തിൽ, കഴിഞ്ഞ വർഷം 32 രാജ്യങ്ങളിൽ ഇന്റർനെറ്റ് താൽക്കാലികമായി നിർത്തിവച്ചിരുന്നു. ഏകദേശം 4.2 ബില്യൺ ആളുകൾ ഇന്റർനെറ്റ് സെൻസർഷിപ്പിന് വിധേയരായിട്ടുണ്ടെന്നും ഈ കേസുകളിൽ പകുതിയോളം (47%) ഏഷ്യൻ രാജ്യങ്ങളിലാണെന്നും സർഫ്ഷാർക്ക് പറയുന്നു. എന്നിരുന്നാലും, 2021 നെ അപേക്ഷിച്ച് കഴിഞ്ഞ വർഷം ഇന്റർനെറ്റ് തടസ്സപ്പെടുത്തൽ കേസുകൾ 40% കുറഞ്ഞു, സർഫ്ഷാർക്ക് അതിന്റെ പഠനത്തിൽ പറയുന്നു.