ഞാനും സാധാരണക്കാരിയാണ്; അതിനാൽ എനിക്ക് മധ്യവർഗത്തിന്റെ സമ്മർദ്ദം മനസ്സിലാക്കാൻ കഴിയും: ബജറ്റിന് മുമ്പായി ധനമന്ത്രി

മധ്യവർഗത്തിന്റെ സമ്മർദ്ദത്തെക്കുറിച്ച് തനിക്ക് അറിയാമെന്നും എന്നാൽ നിലവിലെ സർക്കാർ അവർക്ക് പുതിയ നികുതികളൊന്നും ചുമത്തിയിട്ടില്ലെന്നും കേന്ദ്ര ബജറ്റിന് മുന്നോടിയായി, ധനമന്ത്രി നിർമ്മല സീതാരാമൻ ഞായറാഴ്ച പറഞ്ഞു.

കേന്ദ്ര സർക്കാർ ആദായനികുതി പരിധി ഉയർത്തുമെന്നും മറ്റുള്ളവരെക്കൂടാതെ ഇടത്തരം നികുതിദായകർക്ക് ആശ്വാസം നൽകുമെന്നുമുള്ള പ്രതീക്ഷകൾക്കിടയിലാണ് 2023-24 ലെ കേന്ദ്ര ബജറ്റ് ഫെബ്രുവരി 1 ന് എംഎസ് സീതാരാമൻ ലോക്‌സഭയിൽ അവതരിപ്പിക്കുന്നത്.

“ഞാനും സാധാരണക്കാരിയാണ്, മധ്യവർഗത്തിൽ പെട്ടയാളാണ്, അതിനാൽ എനിക്ക് മധ്യവർഗത്തിന്റെ സമ്മർദ്ദം മനസ്സിലാക്കാൻ കഴിയും. ഞാൻ മധ്യവർഗവുമായി എന്നെത്തന്നെ തിരിച്ചറിയുന്നു, അതിനാൽ എനിക്കറിയാം,” ആർഎസ്‌എസുമായി ബന്ധപ്പെട്ട വാരികയായ പാഞ്ചജന്യ മാസിക സംഘടിപ്പിച്ച ചടങ്ങിൽ സംസാരിക്കവെ അവർ പറഞ്ഞു.

ഇപ്പോഴത്തെ സർക്കാർ ഇടത്തരക്കാർക്കുമേൽ പുതുതായി ഒരു നികുതിയും ചുമത്തിയിട്ടില്ലെന്ന് മന്ത്രി സദസ്സിനെ ഓർമിപ്പിച്ചു. കൂടാതെ, 5 ലക്ഷം രൂപ വരെയുള്ള വരുമാനത്തെ ആദായനികുതിയിൽ നിന്ന് ഒഴിവാക്കിയിട്ടുണ്ടെന്നും അവർ കൂട്ടിച്ചേർത്തു. രാജ്യത്തെ 27 നഗരങ്ങളിൽ മെട്രോ റെയിൽ ശൃംഖല വികസിപ്പിക്കുക, ജീവിത സൗകര്യങ്ങൾ പ്രോത്സാഹിപ്പിക്കുന്നതിനായി 100 സ്മാർട്ട് സിറ്റികൾ നിർമ്മിക്കുക തുടങ്ങിയ വിവിധ നടപടികൾ സർക്കാർ സ്വീകരിച്ചിട്ടുണ്ടെന്ന് അവർ പറഞ്ഞു.

ജനസംഖ്യ വർധിക്കുന്നതിനാൽ ഇടത്തരക്കാർക്കായി സർക്കാരിന് കൂടുതൽ കാര്യങ്ങൾ ചെയ്യാനാകുമെന്ന് മന്ത്രി അവർക്ക് ഉറപ്പ് നൽകി. “ഞാൻ അവരുടെ പ്രശ്‌നങ്ങൾ നന്നായി തിരിച്ചറിയുന്നു. സർക്കാർ അവർക്കായി ഒരുപാട് കാര്യങ്ങൾ ചെയ്തിട്ടുണ്ട്, അത് തുടരുന്നു . 2020 മുതൽ ഓരോ ബജറ്റിലും മൂലധനച്ചെലവിനുള്ള തുക സർക്കാർ ഉയർത്തിക്കൊണ്ടിരിക്കുകയാണ്”- സീതാരാമൻ പറഞ്ഞു. ഈ സാമ്പത്തിക വർഷത്തിൽ, സമ്പദ്‌വ്യവസ്ഥയെ ഗുണിതമായി ബാധിക്കുന്നതിനാൽ ഇത് 35 ശതമാനം വർധിപ്പിച്ച് 7.5 ലക്ഷം കോടി രൂപയായി ഉയർത്തിയതായി അവർ പറഞ്ഞു .