എന്താണ് നാർസിസിസ്റ്റിക് അബ്യൂസ്?

നടി അനുപമ പരമേശ്വരൻ തന്റെ രണ്ട് വർഷം നീണ്ട പ്രണയബന്ധത്തിൽ നേരിട്ട മാനസിക പീഡനത്തെക്കുറിച്ച് തുറന്നുപറഞ്ഞു. ‘നാർസിസിസ്റ്റിക് അബ്യൂസ്’ അനുഭവിച്ചാണ് ആ കാലഘട്ടം കടന്നുപോയതെന്ന് ധന്യ വർമ്മയ്ക്ക് നൽകിയ അഭിമുഖത്തിൽ അനുപമ വെളിപ്പെടുത്തി.

ആദ്യത്തിൽ സ്നേഹവും കരുതലും പ്രകടിപ്പിച്ച് വിശ്വാസം നേടിയ ശേഷം പങ്കാളി ക്രമേണ നിയന്ത്രണം സ്ഥാപിക്കുന്ന രീതിയായിരുന്നു ബന്ധത്തിലുണ്ടായിരുന്നതെന്ന് താരം പറഞ്ഞു. ഇതിന്റെ ഫലമായി മുമ്പ് സന്തോഷത്തോടെ ചെയ്തിരുന്ന കാര്യങ്ങളിൽ ആത്മവിശ്വാസം നഷ്ടപ്പെടുകയും ആങ്സൈറ്റി ഉൾപ്പെടെയുള്ള മാനസിക ബുദ്ധിമുട്ടുകൾ നേരിടേണ്ടിവന്നതായും അനുപമ വ്യക്തമാക്കി.

ഒടുവിൽ ആ ബന്ധം അവസാനിപ്പിച്ചതായും പിന്നീട് താൻ മാത്രമല്ല, നിരവധി ആളുകൾ സമാനമായ അനുഭവങ്ങളിലൂടെ കടന്നുപോകുന്നുണ്ടെന്ന് മനസിലായതോടെയാണ് ഈ വിഷയത്തെക്കുറിച്ച് പൊതുവേദിയിൽ സംസാരിക്കാൻ തീരുമാനിച്ചതെന്നും അവർ പറഞ്ഞു.

നാർസിസിസ്റ്റിക് അബ്യൂസിന്റെ പ്രധാന ലക്ഷണങ്ങളായി അമിത സ്നേഹപ്രകടനം, നിരന്തര കുറ്റപ്പെടുത്തൽ, ഗ്യാസ് ലൈറ്റിങ്, വികാരങ്ങളെ ചെറുതാക്കൽ, നിയന്ത്രണ സ്വഭാവം, സാമൂഹിക ബന്ധങ്ങളിൽ നിന്ന് അകറ്റൽ തുടങ്ങിയവയെ വിദഗ്ധർ ചൂണ്ടിക്കാട്ടുന്നു.

ആരോഗ്യകരമായ ബന്ധങ്ങൾക്ക് സ്നേഹത്തിനൊപ്പം ബഹുമാനം, വിശ്വാസം, സുരക്ഷിതത്വം, വ്യക്തിപരമായ അതിരുകൾ എന്നിവയും അനിവാര്യമാണെന്ന് അനുപമ ഓർമ്മിപ്പിച്ചു.