‘രണബാലി’ ഒക്ടോബർ 16ന് തിയറ്ററുകളിലേക്ക്; വിജയ് ദേവരകൊണ്ടയും രശ്മിക മന്ദാനയും വീണ്ടും ഒന്നിക്കുന്നു

വിജയ് ദേവരകൊണ്ടയും രശ്മിക മന്ദാനയും പ്രധാന വേഷങ്ങളിലെത്തുന്ന പാൻ-ഇന്ത്യൻ ചിത്രം **‘രണബാലി’**യുടെ റിലീസ് തീയതി പ്രഖ്യാപിച്ചു. രാഹുൽ സംകൃത്യൻ സംവിധാനം ചെയ്യുന്ന ചിത്രം വിജയദശമി ആഘോഷങ്ങളുടെ ഭാഗമായി ഒക്ടോബർ 16ന് ലോകവ്യാപകമായി തിയറ്ററുകളിലെത്തും.

മൈത്രി മൂവി മേക്കേഴ്‌സിന്റെ ബാനറിൽ നവീൻ യെർനേനിയും വൈ. രവിശങ്കറും ചേർന്നാണ് ചിത്രം നിർമ്മിക്കുന്നത്. ഗുൽഷൻ കുമാർ, ഭൂഷൺ കുമാർ, ടി-സീരീസ് എന്നിവരാണ് ചിത്രം അവതരിപ്പിക്കുന്നത്.

ചിത്രത്തിൽ വീരയോദ്ധാവായ ‘രണബാലി’ എന്ന കഥാപാത്രത്തെയാണ് വിജയ് ദേവരകൊണ്ട അവതരിപ്പിക്കുന്നത്. ജയമ്മ എന്ന കഥാപാത്രമായി രശ്മിക മന്ദാനയും എത്തുന്നു. ഇരുവരുടെയും പ്രണയം അടയാളപ്പെടുത്തുന്ന ‘എന്തയ്യ സാമി’ എന്ന ഗാനം ഇതിനോടകം ശ്രദ്ധ നേടിയിട്ടുണ്ട്.

‘ഗീതാ ഗോവിന്ദം’, ‘ഡിയർ കോമ്രേഡ്’ എന്നീ ചിത്രങ്ങൾക്ക് ശേഷം വിജയ് ദേവരകൊണ്ടയും രശ്മിക മന്ദാനയും ഒന്നിക്കുന്ന മൂന്നാമത്തെ ചിത്രമാണിത്. വിവാഹശേഷം ഇരുവരും ഒരുമിച്ച് അഭിനയിക്കുന്ന ആദ്യ പ്രോജക്റ്റ് എന്ന പ്രത്യേകതയും ചിത്രത്തിനുണ്ട്. ഇതുവരെ കാണാത്ത തരത്തിലുള്ള മേക്കോവറിലാണ് വിജയ് ദേവരകൊണ്ട ചിത്രത്തിലെത്തുന്നതെന്നാണ് അണിയറപ്രവർത്തകരുടെ അവകാശവാദം.

1876 മുതൽ 1878 വരെയുള്ള ബ്രിട്ടീഷ് ഭരണകാലത്ത് ജീവൻ നഷ്ടമായെന്ന് പറയപ്പെടുന്ന ലക്ഷക്കണക്കിന് ഇന്ത്യക്കാരുടെ ഓർമയ്ക്കായി ചിത്രം ഒരുക്കിയിരിക്കുന്നതായാണ് അണിയറപ്രവർത്തകർ പറയുന്നത്. അക്കാലത്ത് ഇന്ത്യയിൽ നടന്ന യഥാർഥ ചരിത്രസംഭവങ്ങളും മറച്ചുവെക്കപ്പെട്ട ചരിത്രരേഖകളും അടിസ്ഥാനമാക്കിയുള്ള സിനിമാറ്റിക് പുനരാവിഷ്കാരമായാണ് ‘രണബാലി’യെ അവതരിപ്പിക്കുന്നത്.

‘സിംഗനമല ബൊബ്ബിലി രണബാലി’ എന്ന കഥാപാത്രത്തിലൂടെ വിജയ് ദേവരകൊണ്ട ശ്രദ്ധേയമായ പ്രകടനം കാഴ്ചവയ്ക്കുമെന്നാണ് അണിയറപ്രവർത്തകരുടെ സൂചന. ‘ദ മമ്മി’, ‘ബ്ലഡ് ഡയമണ്ട്’ തുടങ്ങിയ ചിത്രങ്ങളിലൂടെ ശ്രദ്ധേയനായ അർണോൾഡ് വോസ്ലൂ ചിത്രത്തിൽ ബ്രിട്ടീഷ് ഉദ്യോഗസ്ഥനായ സർ തിയോഡോർ ഹെക്ടർ എന്ന ശക്തമായ പ്രതിനായക കഥാപാത്രത്തെ അവതരിപ്പിക്കുന്നു.