മരപ്പണി ചെയ്യാൻ ശ്രമം; രാഹുൽ ഗാന്ധി ഡൽഹിയിലെ ഫർണിച്ചർ മാർക്കറ്റ് സന്ദർശിച്ചു
കോൺഗ്രസ് നേതാവും വയനാട് എംപിയുമായ രാഹുൽ ഗാന്ധി ഇന്ന് കീർത്തി നഗർ ഫർണിച്ചർ മാർക്കറ്റ് സന്ദർശിച്ച് ജോലിസ്ഥലത്തെ പണിക്കാരുമായി സംവദിച്ചു. രാഹുൽ അടുത്ത കാലത്ത് ദേശീയ തലസ്ഥാനത്ത് നടത്തുന്ന മൂന്നാമത്തെ സന്ദർശനമാണിത്. ഓഗസ്റ്റിൽ ആസാദ്പൂർ മാണ്ഡിയിൽ പഴം, പച്ചക്കറി കച്ചവടക്കാരെ കണ്ടുമുട്ടിയ അദ്ദേഹം അടുത്തിടെ ആനന്ദ് വിഹാർ റെയിൽവേ സ്റ്റേഷനിൽ പോർട്ടർമാരുമായി സംസാരിക്കുകയും ചെയ്തിരുന്നു
ഇന്ന് ഫർണിച്ചർ മാർക്കറ്റ് സന്ദർശിച്ചപ്പോൾ, രാഹുൽ ഗാന്ധി ആശാരിമാരുമായി സംവദിക്കുകയും അവരുടെ പ്രശ്‌നങ്ങൾ കേൾക്കുകയും ചില ഫർണിച്ചർ വസ്തുക്കൾ നിർമ്മിക്കാൻ ശ്രമിക്കുകയും ചെയ്തു. “ഇന്ന് ഞാൻ ഡൽഹിയിലെ കീർത്തി നഗറിൽ സ്ഥിതി ചെയ്യുന്ന ഏഷ്യയിലെ ഏറ്റവും വലിയ ഫർണിച്ചർ മാർക്കറ്റിൽ പോയി മരപ്പണിക്കാരായ സഹോദരങ്ങളെ കണ്ടു. കഠിനാധ്വാനികൾക്ക് പുറമേ, അവർ അതിശയകരമായ കലാകാരന്മാർ കൂടിയാണ് – ഈടുനിൽക്കുന്നതിലും സൗന്ദര്യത്തിലും വിദഗ്ദ്ധർ,” രാഹുൽ ഗാന്ധി എക്‌സിൽ ഒരു പോസ്റ്റിൽ പറഞ്ഞു.
“ഞങ്ങൾ ഒരുപാട് സംസാരിച്ചു, അവരുടെ കഴിവുകളെക്കുറിച്ച് കുറച്ച് അറിയുകയും കുറച്ച് പഠിക്കാൻ ശ്രമിക്കുകയും ചെയ്തു,” – കൂട്ടിച്ചേർത്തു. സോഷ്യൽ മീഡിയയായ എക്‌സിൽ കീർത്തി നഗർ മാർക്കറ്റിൽ രാഹുൽ ഗാന്ധി നടത്തിയ സന്ദർശനത്തിന്റെ ചിത്രങ്ങളും കോൺഗ്രസ് പങ്കുവെച്ചു, അതിൽ ചില ഫർണിച്ചർ ഉപകരണങ്ങളുമായി അദ്ദേഹം കൈ നോക്കുന്നത് കാണാം.
