ഐഒഎ തെരഞ്ഞെടുപ്പിൽ പി.ടി. ഉഷയുടെ തോൽവി; ബിജെപിയുമായുള്ള അകൽച്ച തിരിച്ചടിയായെന്ന് സൂചന

ഇന്ത്യൻ ഒളിമ്പിക് അസോസിയേഷൻ (ഐഒഎ) തെരഞ്ഞെടുപ്പിൽ പി.ടി. ഉഷയ്ക്കുണ്ടായ പരാജയത്തിന് പിന്നിൽ ബിജെപിയുമായുള്ള ബന്ധത്തിലെ അകൽച്ചയാണെന്ന വിലയിരുത്തലുകൾ. തെരഞ്ഞെടുപ്പ് ഫലം പുറത്തുവന്നതോടെ വിജയിച്ചവരും പരാജയപ്പെട്ടവരും തമ്മിലുള്ള ചേരിപ്പോരും രാഷ്ട്രീയ ഇടപെടലുകളെക്കുറിച്ചുള്ള ആരോപണങ്ങളും ശക്തമായിരിക്കുകയാണ്.

മുൻ അമ്പെയ്ത്ത് താരം ഡോളാ ബാനർജി ന്യൂ ഭാരത് പാനലിനായി വാട്സാപ്പ് സന്ദേശങ്ങളിലൂടെ വോട്ടഭ്യർഥിച്ചത് തെരഞ്ഞെടുപ്പ് പെരുമാറ്റച്ചട്ടത്തിന്റെ ലംഘനമാണെന്ന് ആരോപിച്ചാണ് പി.ടി. ഉഷ പരാതി നൽകിയത്. അഞ്ജു ബോബി ജോർജ്, സൈന നെഹ്‌വാൾ, റാണി രാംപാൽ, ഡോളാ ബാനർജി എന്നിവർ ഉൾപ്പെട്ട പാനലിന് വേണ്ടിയായിരുന്നു പ്രചാരണം.

ബിജെപി സർക്കാരിന് താൽപ്പര്യമുള്ള ചിലർക്കെതിരെ ഉഷ നിലപാടെടുത്തത് തിരിച്ചടിയായെന്നാണ് പുറത്തുവരുന്ന വിലയിരുത്തലുകൾ. തെരഞ്ഞെടുപ്പിന് തൊട്ടുമുമ്പ് എട്ട് പുരുഷ താരങ്ങളടക്കം 13 പേർ ഒരേസമയം നാമനിർദേശ പത്രിക പിൻവലിച്ചതിലും ദുരൂഹത ആരോപിക്കപ്പെടുന്നുണ്ട്.

പുരുഷ താരങ്ങളുടെ വിഭാഗത്തിൽ മത്സരമില്ലാതിരിക്കുകയും വനിതാ വിഭാഗത്തിൽ ബിജെപിയുടെ പിന്തുണയുള്ളവരെന്ന് കരുതപ്പെടുന്ന സ്ഥാനാർഥികൾ തമ്മിൽ മത്സരം നടക്കുകയും ചെയ്തതാണ് രാഷ്ട്രീയ ഇടപെടലുകളെക്കുറിച്ചുള്ള സംശയങ്ങൾക്ക് ഇടയാക്കിയത്. കായിക മന്ത്രാലയത്തിന്റെയും വിവിധ കായിക ഫെഡറേഷനുകളുടെയും ഭാഗത്തുനിന്ന് തെരഞ്ഞെടുപ്പിൽ അനാവശ്യ ഇടപെടലുകളുണ്ടായെന്ന ആരോപണങ്ങളും ഉയർന്നിട്ടുണ്ട്. കായിക ഫെഡറേഷനുകൾ പി.ടി. ഉഷയ്ക്ക് പിന്തുണ നൽകിയില്ലെന്ന റിപ്പോർട്ടുകളും പുറത്തുവരുന്നുണ്ട്.