പീഡനക്കേസ് റദ്ദാക്കണം; യൂത്ത് കോൺഗ്രസ് അധ്യക്ഷൻ കോടതിയെ സമീപിച്ചു
തന്നെ ഉപദ്രവിക്കുകയും മർദിക്കുകയും ചെയ്‌തെന്ന് ആരോപിച്ച് പുറത്താക്കപ്പെട്ട വനിതാ പാർട്ടി നേതാവ് നൽകിയ എഫ്‌ഐആർ റദ്ദാക്കണമെന്ന് ആവശ്യപ്പെട്ട് യൂത്ത് കോൺഗ്രസ് ദേശീയ പ്രസിഡന്റ് ശ്രീനിവാസ് ബിവി ബുധനാഴ്ച ഗുവാഹത്തി ഹൈക്കോടതിയിൽ ഹർജി നൽകി. ജസ്റ്റിസ് അജിത് ബോർഡാകൂറിന്റെ കോടതിയിൽ സമർപ്പിച്ച ഹർജി മെയ് രണ്ടിന് കൂടുതൽ വാദം കേൾക്കാനായി മാറ്റി.
കഴിഞ്ഞ ആറ് മാസമായി ശ്രീനിവാസ് തന്നെ ശല്യപ്പെടുത്തുകയും പീഡിപ്പിക്കുകയും ചെയ്യുന്നുവെന്നും ഇയാൾക്കെതിരെ പരാതി നൽകിയാൽ ഗുരുതരമായ പ്രത്യാഘാതങ്ങൾ നേരിടേണ്ടി വരുമെന്ന് ഭീഷണിപ്പെടുത്തിയെന്നും വനിതാ നേതാവ് ഏപ്രിൽ 19 ന് ദിസ്പൂർ പോലീസ് സ്റ്റേഷനിൽ പരാതി നൽകിയിരുന്നു.
ഫെബ്രുവരിയിൽ റായ്പൂരിൽ നടന്ന പാർട്ടി പ്ലീനറി സമ്മേളനത്തിനിടെ പ്രതികൾ തന്നെ ചീത്തവിളിക്കുകയും രാഷ്ട്രീയ ജീവിതം നശിപ്പിക്കുമെന്ന് ഭീഷണിപ്പെടുത്തുകയും ചെയ്തതായി അസം യൂണിറ്റ് യൂത്ത് കോൺഗ്രസ് പ്രസിഡന്റായ യുവതി പരാതിയിൽ ആരോപിച്ചു. സ്ത്രീ പീഡനവുമായി ബന്ധപ്പെട്ട ഐപിസിയിലെ വിവിധ വകുപ്പുകൾ പ്രകാരവും ഐടി ആക്‌ട് പ്രകാരവും ശ്രീനിവാസിനെതിരെ പോലീസ് എഫ്‌ഐആർ രജിസ്റ്റർ ചെയ്തു.
അഞ്ചംഗ ഗുവാഹത്തി പോലീസ് സംഘം ഏപ്രിൽ 23 ന് ബെംഗളൂരുവിലേക്ക് പോയി, മെയ് രണ്ടിനകം ദിസ്പൂർ പോലീസ് സ്റ്റേഷനിൽ ഹാജരാകണമെന്ന് നിർദ്ദേശിച്ച് അദ്ദേഹത്തിന്റെ വസതിയിൽ ഒരു നോട്ടീസ് പതിച്ചു. ഏപ്രിൽ 18 ന് ട്വീറ്റ് പരമ്പരയിൽ അവർ ശ്രീനിവാസിനെതിരെ ചില ആരോപണങ്ങൾ ഉന്നയിച്ചിരുന്നു.
പാർട്ടി വിരുദ്ധ പ്രവർത്തനങ്ങളുടെ പേരിൽ കോൺഗ്രസ് അവർക്ക് കാരണം കാണിക്കൽ നോട്ടീസ് നൽകുകയും പിന്നീട് പാർട്ടിയുടെ പ്രാഥമിക അംഗത്വത്തിൽ നിന്ന് ആറ് വർഷത്തേക്ക് പുറത്താക്കുകയും ചെയ്തിരുന്നു.
