ലോകത്തിലെ ഏറ്റവും വലിയ സജീവ അഗ്നിപർവ്വതം ‘കിലൗയ’ പൊട്ടിത്തെറിച്ചു; സമീപവാസികൾക്ക് ജാഗ്രതാ നിർദ്ദേശം
നിലവിലുള്ളതിൽ ലോകത്തിലെ ഏറ്റവും സജീവമായ അഗ്നിപർവ്വതങ്ങളിൽ ഒന്നായ ഹവായിയിലെ കിലൗയ വീണ്ടും പൊട്ടിത്തെറിച്ചു. ഇവിടെ ഏത് നിമിഷവും ഒരു പൊട്ടിത്തെറിയുണ്ടാകാമെന്ന് യുഎസ് ജിയോളജിക്കൽ സർവ്വേ ജാഗ്രതാ നിർദ്ദേശം നൽകിയിരുന്നു.
ഹവായിലെ അഗ്നിപർവ്വത നിരീക്ഷണാലയം ഇവിടെ നിന്നുള്ള ചിത്രങ്ങൾ പുറത്തുവിട്ടിട്ടുണ്ട്. കിലൗയ പൊട്ടിത്തെറിക്കാൻ തുടങ്ങിയതായാണ് സൂചനയെന്ന് ചിത്രങ്ങൾ വ്യക്തമാക്കുന്നതായി നിരീക്ഷണാലയം അറിയിച്ചു. ഹവായ് അഗ്നിപർവ്വത ദേശീയ ഉദ്യാനത്തിനകത്തും പാർപ്പിട സമൂഹങ്ങളിൽ നിന്ന് അകലെയുമാണ് കിലൗയ സ്ഥിതി ചെയ്യുന്നത്.
അതേപോലെതന്നെ ഹവായ് ദ്വീപിലെ ഹൈപ്പർ ആക്ടീവ് ഷീൽഡിന്റെ ഭാഗവും ഏറ്റവും സജീവമായ അഞ്ച് അഗ്നിപർവ്വതങ്ങളിൽ ഒന്നുമാണ് കിലൗയ. 1200 മീറ്ററിൽ കൂടുതലാണ് ഈ അഗ്നിപർവ്വതത്തിന്റെ ഉയരം. ഹവായിയുടെ തെക്കൻ ഭാഗത്താണ് ഇത് സ്ഥിതി ചെയ്യുന്നത്.നിലവിൽ ആശങ്കപ്പെടേണ്ടതില്ലെങ്കിലും സ്ഥിതിഗതികൾ മാറിയാൽ സ്‌ഫോടനം സമീപവാസികൾക്ക് ഭീഷണിയാകുമെന്ന് യുണൈറ്റഡ് സ്റ്റേറ്റ്‌സ് അറിയിച്ചു.
കഴിഞ്ഞ വർഷം മുതൽ കിലൗയ അഗ്നിപർവ്വതം പുകയുകയാണ്.ഇതിന്റെ സമീപമുള്ള മൗന ലോവ അഗ്നിപർവ്വതം അടുത്തിടെ പൊട്ടിത്തെറിച്ചിരുന്നു. 38 വർഷത്തിന് ശേഷമാണ് ഈ അഗ്നിപർവ്വതം പൊട്ടിത്തെറിച്ചത്.
