കത്രീന കൈഫ് അഭിനയരംഗത്തേക്ക് ശക്തമായ തിരിച്ചുവരവിന് ഒരുങ്ങുന്നു

കഴിഞ്ഞ വർഷം ആൺകുഞ്ഞിന് ജന്മം നൽകിയതിന് പിന്നാലെ ബോളിവുഡ് മുൻനിര നായിക കത്രീന കൈഫ് അഭിനയരംഗത്തേക്ക് ശക്തമായ തിരിച്ചുവരവിന് ഒരുങ്ങുന്നു. പ്രമുഖ ദേശീയ മാധ്യമമായ ഇന്ത്യ ടുഡേ പുറത്തുവിട്ട റിപ്പോർട്ട് പ്രകാരം താരം പുതിയ സിനിമകളുടെ തിരക്കഥകൾ കേട്ടുതുടങ്ങിയിട്ടുണ്ട്. വെള്ളിത്തിരയ്ക്ക് പുറമെ ഒടിടി പ്ലാറ്റ്‌ഫോമുകളിലെ വലിയ പ്രോജക്റ്റുകളും താരം സജീവമായി പരിഗണിക്കുന്നുണ്ടെന്നാണ് വിവരം.

കഴിഞ്ഞ നവംബറിൽ അമ്മയായ കത്രീന, ധൃതിപിടിച്ച് സിനിമകൾ സൈൻ ചെയ്യാൻ താല്പര്യപ്പെടുന്നില്ല. തന്റെ പുതിയ ജീവിതസാഹചര്യങ്ങൾക്കും മുൻഗണനകൾക്കും അനുയോജ്യമായ മികച്ചൊരു കഥയ്ക്കായുള്ള കാത്തിരിപ്പിലാണ് താരം. എല്ലാം ഒത്തുവന്നാൽ അടുത്ത വർഷം അതായത് 2027-ന്റെ രണ്ടാം പകുതിയോടെ താരം വീണ്ടും ക്യാമറയ്ക്ക് മുന്നിലെത്തും. ഒടിടി പ്രോജക്റ്റാണ് കത്രീന തിരഞ്ഞെടുക്കുന്നതെങ്കിൽ അത് താരത്തിന്റെ ഡിജിറ്റൽ അരങ്ങേറ്റത്തിന് വഴിയൊരുക്കും.

ബോളിവുഡിലെ പ്രമുഖ താരങ്ങളെല്ലാം ഒടിടിയിലേക്ക് ചുവടുമാറ്റുമ്പോഴും കത്രീന ഇതുവരെ വെബ് സീരീസുകളുടെയോ ഡിജിറ്റൽ സിനിമകളുടെയോ ഭാഗമായിട്ടില്ല.ശ്രീറാം രാഘവൻ സംവിധാനം ചെയ്ത് 2024 ജനുവരി 12-ന് തിയേറ്ററുകളിൽ എത്തിയ ‘മേരി ക്രിസ്മസ്’ എന്ന ചിത്രത്തിലാണ് കത്രീന കൈഫ് അവസാനമായി അഭിനയിച്ചത്. തെന്നിന്ത്യൻ താരം വിജയ് സേതുപതിക്കൊപ്പം കത്രീന പ്രധാന വേഷത്തിലെത്തിയ ഈ തമിഴ്-ഹിന്ദി ദ്വിഭാഷാ ചിത്രം മികച്ച നിരൂപക പ്രശംസ നേടിയിരുന്നു.

ഇരുവർക്കും ഇടയിലുള്ള കെമിസ്ട്രിയും ഏറെ ചർച്ച ചെയ്യപ്പെട്ടു. ഇതിന് മുൻപ് സൽമാൻ ഖാനൊപ്പം ‘ടൈഗർ 3’ എന്ന ചിത്രത്തിലാണ് താരം വേഷമിട്ടത്. ‘മേരി ക്രിസ്മസിന്’ ശേഷം കത്രീന പൂർണ്ണമായും പൊതുവേദികളിൽ നിന്നും മാധ്യമശ്രദ്ധയിൽ നിന്നും മാറിനിൽക്കുകയായിരുന്നു.

ഏറെ നാളത്തെ പ്രണയത്തിനൊടുവിൽ 2021 ഡിസംബറിലായിരുന്നു കത്രീന കൈഫും ബോളിവുഡ് നടൻ വിക്കി കൗശലും തമ്മിലുള്ള വിവാഹം നടക്കുന്നത്. രാജസ്ഥാനിലെ സവായ് മധോപൂരിൽ വെച്ച് തികച്ചും പരമ്പരാഗതമായ ചടങ്ങുകളോടെ നടന്ന വിവാഹത്തിൽ അടുത്ത സുഹൃത്തുക്കളും കുടുംബാംഗങ്ങളും മാത്രമാണ് പങ്കെടുത്തത്.തുടർന്ന് വിവാഹം കഴിഞ്ഞ് നാല് വർഷത്തിന് ശേഷം 2025 നവംബർ 7-നാണ് ഇരുവർക്കും ആദ്യത്തെ കൺമണി ജനിക്കുന്നത്.

വിഹാൻ കൗശൽ എന്നാണ് തങ്ങളുടെ മകന് ഇവർ പേരിട്ടിരിക്കുന്നത്. മകന്റെ ജനനശേഷമുള്ള കത്രീനയുടെ ഈ മടങ്ങിവരവ് വാർത്ത വലിയ ആവേശത്തോടെയാണ് ബോളിവുഡ് ലോകം ഏറ്റെടുത്തിരിക്കുന്നത്.