കേന്ദ്രസർക്കാരിന്റെ പോപ്പുലർ ഫ്രണ്ട് നിരോധനത്തെ ചോദ്യം ചെയ്തുള്ള ഹർജി തള്ളി കർണാടക ഹൈക്കോടതി
കേന്ദ്രസർക്കാർ പോപ്പുലർ ഫ്രണ്ട് ഓഫ് ഇന്ത്യയെ നിരോധിച്ചത് ചോദ്യം ചെയ്തുള്ള ഹർജി കർണാടക ഹൈക്കോടതി തള്ളി. പി.എഫ്.ഐപ്രസിഡന്റ്നസീർ പാഷ നിലവിൽ ജുഡീഷ്യൽ കസ്റ്റഡിയിലുള്ളതിനാൽ ഭാര്യ മുഖേനയാണ് ഹർജി സമർപ്പിച്ചത്. ജസ്റ്റിസ് എം നാഗപ്രസന്നയുടെ സിംഗിൾ ബെഞ്ചായിരുന്നു നടപടി സ്വീകരിച്ചത്.
ഹർജിക്കാരന് വേണ്ടി മുതിർന്ന അഭിഭാഷകൻ ജയകുമാർ എസ് പാട്ടീൽ വാദിച്ചു, യുഎപിഎ നിയമപ്രകാരമുള്ള സെക്ഷൻ (3) ഉപവകുപ്പ് 3-ലെ വ്യവസ്ഥ പ്രകാരം, പ്രത്യേകവും വ്യതിരിക്തവുമായ കാരണങ്ങൾ രേഖപ്പെടുത്താൻ യോഗ്യതയുള്ള അധികാരിയുടെ ഭാഗത്തുനിന്ന് ബാധ്യതയുണ്ടെന്ന് പറഞ്ഞു.
നിരോധനം ഏർപ്പെടുത്തുന്നതിന് ആവശ്യമായ കാരണങ്ങൾ വിജ്ഞാപനത്തിൽ പറഞ്ഞിട്ടുണ്ടെന്നും ഇതിൽ നിയമവിരുദ്ധമായി ഒന്നുമില്ലെന്നും യൂണിയൻ ഓഫ് ഇന്ത്യയെ പ്രതിനിധീകരിച്ച് സോളിസിറ്റർ ജനറൽ തുഷാർ മേത്ത പറഞ്ഞു.
സെപ്തംബറിലാണ് കേന്ദ്ര ആഭ്യന്തര മന്ത്രാലയം പിഎഫ്ഐ നിരോധനം പ്രഖ്യാപിച്ചത്. ഐഎസ്‌ഐഎസ് പോലുള്ള ഭീകര സംഘടനകളുമായി പിഎഫ്‌ഐക്കും അനുബന്ധ സംഘടനകൾക്കും ബന്ധമുണ്ടെന്ന് ചൂണ്ടിക്കാട്ടിയാണ് ആഭ്യന്തര മന്ത്രാലയം യുഎപിഎ ചുമത്തി നിരോധനം ഏർപ്പെടുത്തിയത്.
