ലോക്സഭ തെരഞ്ഞെടുപ്പിൽ കമൽ ഹാസൻ കോയമ്പത്തൂരിൽ മത്സരിക്കുന്നു; ഡിഎംകെ സഖ്യത്തിന്‍റെ സ്ഥാനാർഥിയാവുമെന്ന് റിപ്പോർട്ട്
2024 ലോക്സഭ തെരഞ്ഞെടുപ്പിൽ നടനും മക്കൾ നീതിമയ്യം (എംഎൻഎം) മേധാവിയുമായ കമൽ ഹാസൻ കോയമ്പത്തൂരിൽ മത്സരിക്കാൻ തയ്യാറെടുക്കുന്നു. സംസ്ഥാനത്തെ ഭരണകക്ഷിയായ ഡിഎംകെ സഖ്യത്തിന്‍റെ സ്ഥാനാർഥിയാവുമെന്നാണ് റിപ്പോർട്ട്.
കോയമ്പത്തൂർ ലോക്സഭ മണ്ഡലത്തിൽ നിന്നും താരം ജനവിധി തേടുന്നതിന്‍റെ മുന്നോടിയായാണ് വെള്ളിയാഴ്ച ചിന്നിയംപാളയത്തെ വൃന്ദാവൻ ഓഡിറ്റോറിയത്തിൽ കോയമ്പത്തൂർ, സേലം ജില്ലയിലെ മുഖ്യ ഭാരവാഹികളുടെ യോഗം വിളിച്ചുകൂട്ടിയതെന്നാണ് വിവരം. നമ്മുടെ രാജ്യത്തെ ജനാധിപത്യം അപകടത്തിലാണെന്ന് കമൽ ഹാസൻ യോഗത്തിൽ പറഞ്ഞു. തിരഞ്ഞെടുപ്പ് സഖ്യം സംബന്ധിച്ച് തീരുമാനമെടുക്കാൻ ഇനിയും സമയമുണ്ടെന്നും അദ്ദേഹം കൂട്ടിച്ചേർത്തിരുന്നു.
