ഇറാൻ സംഘർഷവും ആണവ നിരായുധീകരണവും ചർച്ചയാകും; ഷിയുമായും പുടിനുമായും കൂടിക്കാഴ്ചയ്ക്ക് ട്രംപ്

ഇറാനുമായുള്ള സംഘർഷവും ആണവായുധ നിയന്ത്രണവും നിരായുധീകരണവും ചർച്ച ചെയ്യാൻ ചൈനീസ് പ്രസിഡന്റ് ഷി ജിൻപിങ്ങുമായും റഷ്യൻ പ്രസിഡന്റ് വ്ളാഡിമിർ പുടിനുമായും കൂടിക്കാഴ്ച നടത്തുമെന്ന് യുഎസ് പ്രസിഡന്റ് ഡോണൾഡ് ട്രംപ്. അടുത്തയാഴ്ച ചൈനയിലെ ഷെൻഷെനിൽ നടക്കുന്ന ഏഷ്യ-പസഫിക് സാമ്പത്തിക സഹകരണ (എപെക്) ഉച്ചകോടിക്കിടെയായിരിക്കും കൂടിക്കാഴ്ചകളെന്നാണ് സൂചന. നവംബർ 18, 19 തീയതികളിലാണ് ഉച്ചകോടി നടക്കുന്നത്.

ഫ്ലോറിഡയിൽനിന്ന് വാഷിങ്ടണിലേക്ക് മടങ്ങുന്നതിനിടെ മാധ്യമങ്ങളോട് സംസാരിക്കുകയായിരുന്നു ട്രംപ്. ഷിയുമായും പുടിനുമായും കൂടിക്കാഴ്ചയുണ്ടാകുമെന്നാണ് കരുതുന്നതെന്നും നിരവധി സുപ്രധാന വിഷയങ്ങൾ ചർച്ച ചെയ്യാനുണ്ടെന്നും അദ്ദേഹം പറഞ്ഞു. ഇറാന്റെ ആണവപദ്ധതി, പശ്ചിമേഷ്യയിലെ സംഘർഷം, ആണവായുധ നിയന്ത്രണം എന്നിവയാകും ചർച്ചയിലെ പ്രധാന വിഷയങ്ങൾ. ഇറാനിലെ യുദ്ധം അവസാനിപ്പിക്കാനുള്ള ശ്രമങ്ങൾ തുടരുകയാണെന്നും ട്രംപ് വ്യക്തമാക്കി.

നേരത്തേ ഒക്ടോബറിലും ഷിയുമായും പുടിനുമായും ചേർന്ന് ത്രികക്ഷി ആയുധനിയന്ത്രണ ചർച്ചകൾ നടത്താൻ തയ്യാറാണെന്ന് ട്രംപ് അറിയിച്ചിരുന്നു. ആണവായുധങ്ങളുടെ നിയന്ത്രണവും നിരായുധീകരണവുമാണ് ഇത്തരം ചർച്ചകളുടെ ലക്ഷ്യമെന്നും അദ്ദേഹം വ്യക്തമാക്കിയിരുന്നു. അതേസമയം, റഷ്യ-യുക്രെയ്ൻ യുദ്ധം അവസാനിപ്പിക്കാനുള്ള ചർച്ചകൾക്കും ത്രികക്ഷി കൂടിക്കാഴ്ച വേദിയാകണമെന്ന് പുടിൻ നിർദേശിച്ചതായി വാൾസ്ട്രീറ്റ് ജേണൽ റിപ്പോർട്ട് ചെയ്തിരുന്നു.

ഇറാനെതിരായ പുതിയ സാമ്പത്തിക ഉപരോധങ്ങൾ പ്രാബല്യത്തിൽ വന്നതായും ട്രംപ് അറിയിച്ചു. ഇറാനിലേക്കുള്ള കരമാർഗ ചരക്കുനീക്കവും വിതരണ ശൃംഖലയും നിയന്ത്രിക്കുകയാണ് അമേരിക്കയുടെ ലക്ഷ്യം. ഇറാന്റെ ആണവപദ്ധതിയുമായി ബന്ധപ്പെട്ട ചർച്ചകളിലും ഹോർമുസ് കടലിടുക്ക് വീണ്ടും തുറക്കുന്നതിലും പുരോഗതിയുണ്ടാകണമെന്നാണ് യുഎസ് നിലപാട്. ചർച്ചകളിൽ അനുകൂല പുരോഗതിയുണ്ടായാൽ പുതിയ സൈനിക ആക്രമണത്തിനുള്ള സാധ്യത കുറവായിരിക്കുമെന്നും ട്രംപ് പറഞ്ഞു.

എന്നാൽ, അമേരിക്ക വീണ്ടും ആക്രമണം നടത്തിയാൽ ശക്തമായി തിരിച്ചടിക്കുമെന്ന് ഇറാൻ വിദേശകാര്യമന്ത്രി അബ്ബാസ് അരാഗ്ചി മുന്നറിയിപ്പ് നൽകി. ഹോർമുസ് കടലിടുക്ക് തുറക്കുന്നതുമായി ബന്ധപ്പെട്ട ഇറാന്റെ നിർദേശങ്ങൾ അംഗീകരിക്കണമെന്നും അദ്ദേഹം ആവശ്യപ്പെട്ടു. ഇറാനുമേലുള്ള ഉപരോധങ്ങൾ പിൻവലിക്കുക, മേഖലയിൽനിന്ന് യുഎസ് സൈനികരെ പിൻവലിക്കുക, ഖത്തറിൽനിന്നുൾപ്പെടെയുള്ള സാമ്പത്തിക സഹായങ്ങൾ പുനഃസ്ഥാപിക്കുക, ലബനനിലെ ഇസ്രയേൽ ആക്രമണം ഉൾപ്പെടെയുള്ള യുദ്ധങ്ങൾ അവസാനിപ്പിക്കുക തുടങ്ങിയ ആവശ്യങ്ങളാണ് ഇറാൻ മുന്നോട്ടുവച്ചിരിക്കുന്നത്. ഈ വ്യവസ്ഥകൾ അംഗീകരിച്ചാൽ അടുത്ത ദിവസം തന്നെ ഹോർമുസ് കടലിടുക്ക് പഴയ നിലയിലാകുമെന്നും അരാഗ്ചി വ്യക്തമാക്കി.

അതിനിടെ, വടക്കൻ ഇറാഖിലെ കുർദിസ്ഥാൻ മേഖലയിൽ ഡ്രോൺ ആക്രമണത്തെത്തുടർന്ന് വ്യാപക വൈദ്യുതിമുടക്കം റിപ്പോർട്ട് ചെയ്തു. ഖോർ മോർ പ്രകൃതിവാതക കേന്ദ്രത്തിനു നേരെയുണ്ടായ ആക്രമണത്തിൽ സ്ഫോടനവും തീപിടിത്തവുമുണ്ടായതോടെ വാതക ഉൽപാദനം നിർത്തിവച്ചു. കുർദിസ്ഥാൻ മേഖലയിലെ 70 ശതമാനത്തിലധികം പ്രദേശങ്ങളിലും വൈദ്യുതി വിതരണം തടസ്സപ്പെട്ടതായാണ് റിപ്പോർട്ട്.