ഇസ്രയേലിൽ തൂക്കുപാർലമെന്റ്; നെതന്യാഹുവിന് ഭൂരിപക്ഷമില്ല, നിർണായക ശക്തിയായി അറബ് പാർട്ടികൾ

ഇസ്രയേൽ പൊതുതെരഞ്ഞെടുപ്പിൽ പ്രധാനമന്ത്രി ബെഞ്ചമിൻ നെതന്യാഹുവിന്റെ നേതൃത്വത്തിലുള്ള ലിക്കുഡ് സഖ്യത്തിന് ഭൂരിപക്ഷം നേടാനായില്ല. 120 അംഗ പാർലമെന്റിൽ സർക്കാർ രൂപീകരിക്കാൻ ആവശ്യമായ 61 സീറ്റുകൾ നേടുന്നതിൽ പ്രധാന മുന്നണികൾ പരാജയപ്പെട്ടതോടെ രാജ്യത്ത് തൂക്കുപാർലമെന്റിന് വഴിയൊരുങ്ങി. അതേസമയം, 19 സീറ്റുകൾ നേടി ചരിത്രത്തിലെ ഏറ്റവും മികച്ച പ്രകടനം കാഴ്ചവെച്ച അറബ് പാർട്ടികൾ പുതിയ സർക്കാർ രൂപീകരണത്തിൽ നിർണായക ശക്തിയായി മാറി.

അന്തിമ ഫലപ്രകാരം നെതന്യാഹു അനുകൂല മുന്നണിക്ക് 53 സീറ്റുകളാണ് ലഭിച്ചത്. ഗാഡി ഐസൻകോട്ടിന്റെ നേതൃത്വത്തിലുള്ള പ്രതിപക്ഷ സഖ്യം 48 സീറ്റുകളും നേടി. ലിക്കുഡ് ഏറ്റവും വലിയ ഒറ്റക്കക്ഷിയായെങ്കിലും കേവല ഭൂരിപക്ഷത്തിലേക്ക് എത്താൻ നെതന്യാഹുവിന്റെ മുന്നണിക്ക് സാധിച്ചില്ല.

അധികാരത്തിലെത്താൻ നെതന്യാഹുവിനും ഐസൻകോട്ടിനും അറബ് പാർട്ടികളുടെ പിന്തുണ ആവശ്യമാണ്. എന്നാൽ അറബ് പാർട്ടികളുമായി സഹകരിക്കുന്നതിൽ ഇരുവിഭാഗങ്ങളിലും നിലനിൽക്കുന്ന വിയോജിപ്പുകൾ സർക്കാർ രൂപീകരണ ചർച്ചകളെ സങ്കീർണമാക്കിയേക്കും. മുന്നണികൾക്ക് ധാരണയിലെത്താനായില്ലെങ്കിൽ ഇസ്രയേലിൽ വീണ്ടും തെരഞ്ഞെടുപ്പ് വേണ്ടിവന്നേക്കും.

ഇസ്രയേൽ ജനസംഖ്യയുടെ ഏകദേശം 21 ശതമാനം വരുന്ന അറബ് പൗരന്മാരുടെ വോട്ടുകൾ ഇത്തവണ നിർണായകമായി. കഴിഞ്ഞ പാർലമെന്റിൽ പത്ത് സീറ്റുകൾ മാത്രമുണ്ടായിരുന്ന ജോയിന്റ് ലിസ്റ്റ്, റാഅം തുടങ്ങിയ അറബ് പാർട്ടികൾ ഇത്തവണ ആകെ 19 സീറ്റുകളാണ് നേടിയത്. ഇതോടെ പുതിയ സർക്കാർ രൂപീകരണത്തിൽ അവരുടെ നിലപാടിന് വലിയ പ്രാധാന്യം കൈവന്നിരിക്കുകയാണ്.

പതിറ്റാണ്ടുകൾക്കിടയിലെ ഉയർന്ന പോളിങ് ശതമാനവും ഇത്തവണ രേഖപ്പെടുത്തി. 77.9 ശതമാനം വോട്ടർമാർ സമ്മതിദാനാവകാശം വിനിയോഗിച്ചു. ആകെ 57,16,665 വോട്ടുകളാണ് രേഖപ്പെടുത്തിയത്. ഭൂരിപക്ഷമില്ലാത്ത പാർലമെന്റിൽ അടുത്ത സർക്കാർ ആരുടെ നേതൃത്വത്തിലായിരിക്കുമെന്നതും അറബ് പാർട്ടികൾ ആരെ പിന്തുണയ്ക്കുമെന്നതുമാണ് ഇനി ഉറ്റുനോക്കുന്നത്.