ബംഗാളിൽ സംഭവിച്ചത് മമതയുടെ 15 വർഷത്തെ ഭരണത്തിന് അന്ത്യം
പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ വോട്ടെണ്ണൽ അവസാന ഘട്ടത്തിലേക്ക് കടക്കുമ്പോൾ, സംസ്ഥാനത്ത് ആദ്യമായി അധികാരം പിടിച്ചെടുത്ത് ബിജെപി പുതിയ ചരിത്രം കുറിക്കുകയാണ്. ഭരണം പിടിക്കാൻ 148 സീറ്റുകൾ വേണമെന്നിരിക്കെ, ആകെയുള്ള 294 മണ്ഡലങ്ങളിൽ 194 സീറ്റുകളിലും ലീഡ് ചെയ്ത് ബിജെപി തങ്ങളുടെ വ്യക്തമായ ഭൂരിപക്ഷം നിലനിർത്തുന്നുണ്ട്.
ഇതിനകം തന്നെ നാല് സീറ്റുകളിൽ ബിജെപി വിജയം ഉറപ്പിച്ചു കഴിഞ്ഞു. എന്നാൽ 15 വർഷം നീണ്ട ഭരണത്തിന് ശേഷം മമത ബാനർജിയുടെ തൃണമൂൽ കോൺഗ്രസ് വലിയ തകർച്ചയെയാണ് നേരിടുന്നത്. നിലവിൽ വെറും 88 സീറ്റുകളിൽ മാത്രം മുന്നിട്ടുനിൽക്കുന്ന ടിഎംസിക്ക് ഇതുവരെ ഒരു സീറ്റിൽ മാത്രമേ വിജയിക്കാൻ സാധിച്ചിട്ടുള്ളൂ.
മുഖ്യമന്ത്രി മമത ബാനർജി മത്സരിക്കുന്ന ഭവാനിപൂർ മണ്ഡലത്തിൽ പത്താം റൗണ്ട് വോട്ടെണ്ണൽ പൂർത്തിയായപ്പോൾ ബിജെപിയുടെ സുവേന്ദു അധികാരിക്കെതിരെ മമതയുടെ ലീഡ് 12,131 ആയി കുറഞ്ഞു. മണ്ഡലത്തിൽ ഇപ്പോഴും കടുത്ത പോരാട്ടമാണ് നടക്കുന്നത്. കഴിഞ്ഞ തവണ നേരിട്ട വലിയ തിരിച്ചടികളിൽ നിന്ന് കരകയറാൻ ലക്ഷ്യമിട്ടിറങ്ങിയ കോൺഗ്രസിനും ഇടതുപക്ഷത്തിനും ഇത്തവണയും സംസ്ഥാന രാഷ്ട്രീയത്തിൽ വലിയ മുന്നേറ്റം ഉണ്ടാക്കാനായില്ല.
നിലവിൽ സിപിഐ(എം) ഒരു സീറ്റിലും കോൺഗ്രസ് രണ്ട് സീറ്റിലുമാണ് മുന്നിട്ടുനിൽക്കുന്നത്. മുർഷിദാബാദിലെ ദോംകൽ മണ്ഡലത്തിൽ സിപിഐ(എം) സ്ഥാനാർത്ഥി മുഹമ്മദ് മുസ്തഫിജുർ റഹ്മാൻ അഞ്ചാം റൗണ്ടിൽ 8,877 വോട്ടുകൾക്കും, ഇടത് സഖ്യകക്ഷിയായ ഐഎസ്എഫിന്റെ നൗഷാദ് സിദ്ദിഖി ഭാംഗറിൽ 13,981 വോട്ടുകൾക്കും മുന്നിലാണ്.
തുടർച്ചയായി നാലാം തവണയും ഭരണം നിലനിർത്താൻ തൃണമൂൽ കോൺഗ്രസ് കിണഞ്ഞു പരിശ്രമിച്ചെങ്കിലും ബിജെപിയുടെ തരംഗത്തിൽ ഭരണവിരുദ്ധ വികാരം ശക്തമാകുകയായിരുന്നു. ബംഗാളിലെ ഈ ചരിത്രപരമായ ഭരണമാറ്റം രാജ്യത്തെ രാഷ്ട്രീയ സാഹചര്യങ്ങളിൽ വലിയ മാറ്റങ്ങൾക്ക് വഴിതെളിക്കുമെന്നാണ് രാഷ്ട്രീയ നിരീക്ഷകരുടെ വിലയിരുത്തൽ.
അതേസമയം, വോട്ടെണ്ണലിന് പിന്നാലെ സംസ്ഥാനത്ത് ഉണ്ടായേക്കാവുന്ന സംഘർഷ സാധ്യതകൾ ഒഴിവാക്കാൻ കേന്ദ്ര തിരഞ്ഞെടുപ്പ് കമ്മീഷൻ കർശന നടപടികളാണ് സ്വീകരിച്ചിരിക്കുന്നത്. ക്രമസമാധാന പാലനത്തിന്റെ ഭാഗമായി വിജയറാലികൾക്ക് സംസ്ഥാനത്തുടനീളം പൂർണ്ണ വിലക്ക് ഏർപ്പെടുത്തിയതായി സ്പെഷ്യൽ ഒബ്സർവർ സുബ്രത ഗുപ്ത അറിയിച്ചു.
