ഇടക്കാല തിരഞ്ഞെടുപ്പ് തിരിച്ചടിക്ക് പിന്നാലെ ട്രംപിന്റെ രോഷപ്രകടനം; മാധ്യമപ്രവർത്തകയെ അധിക്ഷേപിച്ചു
അമേരിക്കൻ പ്രതിരോധ സെക്രട്ടറി പീറ്റ് ഹെഗ്‌സെത്തിനെതിരായ ഇംപീച്ച്‌മെന്റ് നീക്കത്തെ പിന്തുണയ്ക്കില്ലെന്ന് പ്രസിഡന്റ് ഡോണൾഡ് ട്രംപ്. നവംബർ 9ന് വൈറ്റ് ഹൗസിൽ നടത്തിയ വാർത്താസമ്മേളനത്തിനിടെ സിഎൻഎൻ റിപ്പോർട്ടർ കൈറ്റ്‌ലാൻ കോളിൻസ് ഉന്നയിച്ച ചോദ്യങ്ങളോടാണ് ട്രംപ് ക്ഷുഭിതനായത്. ഹെഗ്‌സെത്തിനെതിരെ ഇംപീച്ച്‌മെന്റ് നടപടിയുണ്ടായാലും അദ്ദേഹത്തിനൊപ്പം ഉറച്ചുനിൽക്കുമെന്ന് ട്രംപ് വ്യക്തമാക്കി.
ഹെഗ്‌സെത്ത് നിയമവിരുദ്ധമായി പ്രവർത്തിച്ചെന്ന ആരോപണവും റിപ്പബ്ലിക്കൻ പ്രതിനിധി തോമസ് മാസി സമർപ്പിച്ച ഇംപീച്ച്‌മെന്റ് പ്രമേയവും കോളിൻസ് ചൂണ്ടിക്കാട്ടിയതോടെ ട്രംപ് മാധ്യമപ്രവർത്തകയെയും മാസിയെയും വ്യക്തിപരമായി അധിക്ഷേപിച്ചു. സിഎൻഎന്നിന്റെ റേറ്റിങ് കുറഞ്ഞുവെന്ന് പരിഹസിച്ച അദ്ദേഹം മാസിയെ പരാജിതനെന്നും വിശേഷിപ്പിച്ചു.
ഇടക്കാല തിരഞ്ഞെടുപ്പിൽ റിപ്പബ്ലിക്കൻ പാർട്ടിക്കേറ്റ തിരിച്ചടിയും ഡെമോക്രാറ്റുകളുടെ മുന്നേറ്റവും ട്രംപ് ഭരണകൂടത്തിന് സമ്മർദം സൃഷ്ടിക്കുന്നതിനിടെയാണ് സംഭവം. നേരത്തെയും എപ്സ്റ്റീൻ ഫയലുകൾ ഉൾപ്പെടെയുള്ള വിഷയങ്ങളിൽ ചോദ്യം ഉന്നയിച്ച വനിതാ മാധ്യമപ്രവർത്തകരുമായി ട്രംപ് പരസ്യമായി ഏറ്റുമുട്ടിയിട്ടുണ്ട്.
