ദുരന്തം കാണാൻ താൽപ്പര്യമില്ല; താൽപ്പര്യമുള്ളവർ കേരളാ സ്റ്റോറി 2 കണ്ടോട്ടെ: രാജീവ് ചന്ദ്രശേഖർ

കേരള സ്റ്റോറി 2നെ തള്ളി ബിജെപി സംസ്ഥാന അധ്യക്ഷൻ രാജീവ് ചന്ദ്രശേഖർ. ദുരന്തം കാണാൻ താൽപ്പര്യമില്ലെന്നും, താൽപ്പര്യമുള്ളവർ അത് കണ്ടോട്ടെ, ഇഷ്ടമില്ലാത്തവർ കാണേണ്ടാ എന്നും രാജീവ് ചന്ദ്രശേഖർ പറഞ്ഞു. സിനിമയെടുക്കാൻ എല്ലാവർക്കും അവകാശമുണ്ടെന്നും രാജീവ് ചന്ദ്രശേഖർ വ്യക്തമാക്കി.

സിനിമ എന്നത് വ്യക്തിപരമാണ്. എമ്പുരാനിലും ഇതേ നിലപാടാണ് സ്വീകരിച്ചത്. ജനറൽ നരവനയുടെ പുസ്തകത്തിൽ സൈനിക രഹസ്യങ്ങൾ എഴുതിയതിനാലാണ് പുസ്തകത്തെ എതിർക്കുന്നത് എന്നും രാജീവ് ചന്ദ്രശേഖർ ചൂണ്ടിക്കാട്ടി.

അതേസമയം, കേരളാ സ്റ്റോറി ഉറപ്പായും കാണുമെന്ന് ബിജെപി നേതാവ് കുമ്മനം രാജശേഖരൻ പ്രതികരിച്ചു. സിനിമ എത്ര പേര് കണ്ടു എന്നതല്ല, എന്ത് ചർച്ച ചെയുന്നു എന്നതാണ് പ്രധാനമെന്ന് കുമ്മനം പറഞ്ഞു. കേരളാ സ്റ്റോറി ആദ്യഭാഗം കണ്ടിരുന്നു. സിനിമയിൽ ചിത്രീകരിച്ചിരിക്കുന്നത് യഥാർഥത്തിൽ കേരളത്തിൽ സംഭവിക്കുന്ന കാര്യങ്ങളാണ്. അതിൽ ന്യൂനപക്ഷങ്ങൾക്ക് ഇടയിൽ പോലും ആശങ്ക ഉണ്ടെന്നും കുമ്മനം വ്യക്തമാക്കി. കേരളത്തിൽ ഇങ്ങനെയൊക്കെ സംഭവിക്കുന്നുണ്ടോ എന്ന് ചോദ്യത്തിന് ഉറപ്പായും ഉണ്ടെന്ന് ആയിരുന്നു കുമ്മനത്തിൻ്റെ മറുപടി.