കർണാടകയിൽ കോൺഗ്രസ് മന്ത്രിസഭയുടെ സത്യപ്രതിജ്ഞാ തീയതി പ്രഖ്യാപിച്ചു; മുഖ്യമന്ത്രിയുടെ പേരില്ല

പുതിയ കർണാടക മുഖ്യമന്ത്രിയും മന്ത്രിസഭയും വ്യാഴാഴ്ച സത്യപ്രതിജ്ഞ ചെയ്യുമെന്ന് കോൺഗ്രസ് വൃത്തങ്ങൾ അറിയിച്ചു. ഗാന്ധി കുടുംബത്തിൽ നിന്നുള്ളവരും ദേശീയ കോൺഗ്രസ് അധ്യക്ഷൻ മല്ലികാർജുൻ ഖാർഗെയും ചടങ്ങിൽ പങ്കെടുക്കും. സത്യപ്രതിജ്ഞാ ചടങ്ങിൽ പങ്കെടുക്കാൻ “സമാന ചിന്താഗതിക്കാരായ” എല്ലാ പാർട്ടികൾക്കും കോൺഗ്രസ് ക്ഷണം അയച്ചിട്ടുണ്ട്.

കർണാടക മന്ത്രിസഭയുടെ അന്തിമ രൂപരേഖ ഒന്നോ രണ്ടോ ദിവസത്തിനകം രൂപപ്പെടുമെന്ന് നേരിട്ട് അറിയാവുന്നവർ പറഞ്ഞു. മുഖ്യമന്ത്രി ആരായിരിക്കുമെന്ന് ചർച്ച ചെയ്യാൻ കോൺഗ്രസ് ഇന്ന് ബെംഗളൂരുവിലെ പഞ്ചനക്ഷത്ര ഹോട്ടലിൽ എംഎൽഎമാരുടെ യോഗം വിളിച്ചു.

മുഖ്യമന്ത്രിയെ തിരഞ്ഞെടുക്കാൻ കോൺഗ്രസ് ദേശീയ അധ്യക്ഷന് വിടുന്ന പ്രമേയം കോൺഗ്രസ് ലെജിസ്ലേച്ചർ പാർട്ടി (സിഎൽപി) പാസാക്കുമെന്നാണ് പ്രതീക്ഷിക്കുന്നത്. ഇന്ന് അന്തിമ തീരുമാനമുണ്ടാകില്ലെങ്കിലും എല്ലാ എം.എൽ.എമാരുടെയും അഭിപ്രായം ആരാഞ്ഞേക്കുമെന്ന് ബന്ധപ്പെട്ടവർ അറിയിച്ചു.

അതേസമയം, കോൺഗ്രസ് നേതാവ് ഡികെ ശിവകുമാറിന്റെയും സിദ്ധരാമയ്യയുടെയും അനുയായികൾ യോഗം നടക്കുന്ന ബെംഗളൂരു ഹോട്ടലിന് പുറത്ത് മുദ്രാവാക്യം വിളിച്ചു. കോൺഗ്രസ് ജനറൽ സെക്രട്ടറിമാരായ സുശീൽ കുമാർ ഷിൻഡെ, ദീപക് ബാബരിയ, ജിതേന്ദ്ര സിംഗ് അൽവാർ എന്നിവരാണ് കർണാടക സിഎൽപി യോഗത്തിന്റെ നിരീക്ഷകർ.

സിദ്ധരാമയ്യയെ പിന്തുണയ്ക്കുന്നവർ ബെംഗളൂരുവിലെ അദ്ദേഹത്തിന്റെ വീടിന് പുറത്ത് “കർണ്ണാടകയുടെ അടുത്ത മുഖ്യമന്ത്രി” എന്ന് വിശേഷിപ്പിച്ച് പോസ്റ്റർ പതിച്ചിട്ടുണ്ട്. കർണാടകയിലെ പുതിയ മുഖ്യമന്ത്രിക്ക് ജന്മദിനാശംസകൾ നേർന്ന് ശിവകുമാറിന്റെ വീടിന് പുറത്ത് പോസ്റ്ററുകളും പ്രത്യക്ഷപ്പെട്ടു. നാളെയാണ് ശിവകുമാറിന്റെ ജന്മദിനം.