യെമനിൽ സൗദിക്ക് തിരിച്ചടി; ഹൂതികളുമായി ചർച്ച നടത്തി അമേരിക്ക
യെമനിൽ ഹൂതി മുന്നേറ്റം ശക്തമായതിന് പിന്നാലെ ഒമാനിലെ മസ്കത്തിൽ യുഎസ് ഉദ്യോഗസ്ഥരും ഹൂതി പ്രതിനിധികളും രഹസ്യ കൂടിക്കാഴ്ച നടത്തിയതായി റിപ്പോർട്ട്. 2025ലെ വെടിനിർത്തൽ കരാർ തുടരുകയാണെന്നും ചെങ്കടലിലെ അമേരിക്കൻ കപ്പലുകൾ ലക്ഷ്യമിടില്ലെന്നും ഹൂതികൾ ഉറപ്പ് നൽകിയതായി റോയിട്ടേഴ്സ് റിപ്പോർട്ട് ചെയ്തു.
കൂടിക്കാഴ്ചയ്ക്ക് പിന്നാലെ യെമനിലെ ഹൂതി മുന്നേറ്റം തടയാൻ സൗദി അറേബ്യ നടത്തുന്ന സൈനിക നീക്കത്തിന് നേരിട്ട് സൈനിക പിന്തുണ നൽകേണ്ടതില്ലെന്ന നിലപാടിലാണ് അമേരിക്കയെന്ന് ദി ഗാർഡിയൻ റിപ്പോർട്ട് ചെയ്തു. എന്നാൽ സൗദിക്ക് രഹസ്യാന്വേഷണ വിവരങ്ങളും ലക്ഷ്യനിർണയ സഹായവും നൽകുന്നത് തുടരുന്നതായാണ് റിപ്പോർട്ടുകൾ.
അതിനിടെ, ചെങ്കടൽ തീരത്തെ തന്ത്രപ്രധാന മേഖലകളിൽ ഹൂതികൾ മുന്നേറിയതോടെ ബാബ് അൽ-മന്ദബ് കടലിടുക്കിന്റെ സുരക്ഷയും ആശങ്കയിലായി. മോച്ച തുറമുഖം ഉൾപ്പെടെയുള്ള മേഖലകളിലെ ഹൂതി നിയന്ത്രണം ആഗോള കപ്പൽ ഗതാഗതത്തിനും എണ്ണവിതരണത്തിനും സമ്മർദം വർധിപ്പിക്കുമെന്നാണ് വിലയിരുത്തൽ.
ഇറാൻ സംഘർഷത്തിനിടെ യെമനിൽ മറ്റൊരു വലിയ സൈനിക മുന്നണി തുറക്കുന്നത് ഒഴിവാക്കാനാണ് അമേരിക്ക ശ്രമിക്കുന്നതെന്ന സൂചനയാണ് പുതിയ നീക്കങ്ങൾ നൽകുന്നത്. അതേസമയം, ഹൂതി ആക്രമണങ്ങളുടെ പശ്ചാത്തലത്തിൽ സൗദിയുടെ സുരക്ഷാ ആശങ്കകൾ കൂടുതൽ രൂക്ഷമാകുകയാണ്.
