നടക്കുന്നത് വ്യാജ പ്രചാരണം; ക്രിപ്‌റ്റോകറൻസിയുമായി തനിക്ക് ബന്ധമില്ലെന്ന് രത്തൻ ടാറ്റ
ഡിജിറ്റൽ കറൻസിയായ ക്രിപ്‌റ്റോകറൻസിയുമായി തനിക്ക് ബന്ധമില്ലെന്ന് ഇന്ത്യയിലെ മുതിർന്ന വ്യവസായിയും മുൻ ടാറ്റ ഗ്രൂപ്പ് ചെയർമാനുമായ രത്തൻ ടാറ്റ. ക്രിപ്‌റ്റോകറൻസിയുമായി ബന്ധപ്പെട്ട് നടക്കുന്ന തട്ടിപ്പുകളിൽ തന്റെ പേര് ഉപയോഗിക്കുന്ന തട്ടിപ്പുകാർക്കെതിരെ ജനങ്ങൾക്ക് മുന്നറിയിപ്പ് നൽകിയിരിക്കുകയാണ് രത്തൻ ടാറ്റ.
ക്രിപ്‌റ്റോകറൻസിയിൽ തന്റെ നിക്ഷേപത്തെക്കുറിച്ചുള്ള റിപ്പോർട്ടുകൾ വന്നതോടെ ക്രിപ്‌റ്റോകറൻസിയുമായി തനിക്ക് ബന്ധമില്ലെന്ന് ട്വിറ്ററിലൂടെ ടാറ്റ ഔദ്യോഗിക പ്രസ്താവനയിറക്കുകയായിരുന്നു. ഈ ഡിജിറ്റൽ കറൻസിയുമായി ബന്ധമുണ്ടെന്ന രീതിയിൽ പുറത്തിറങ്ങുന്ന ഏതെങ്കിലും ലേഖനങ്ങളോ പരസ്യങ്ങളോ തികച്ചും സത്യവിരുദ്ധവും പൗരന്മാരെ കബളിപ്പിക്കാൻ ഉദ്ദേശിച്ചുള്ളതുമാണ്.
ക്രിപ്‌റ്റോകറൻസിയുമായുള്ള തന്റെ ബന്ധങ്ങളെ പരാമർശിക്കുന്ന ഏതെങ്കിലും പരസ്യമോ ലേഖനമോ കണ്ടാൽ സൂക്ഷിക്കണമെന്ന് രത്തൻ ടാറ്റ പറഞ്ഞു. അതേസമയം, ക്രിപ്റ്റോ നിക്ഷേപവുമായി ഇന്ത്യയിൽ ഒരു വ്യവസായിയെ ബന്ധപ്പെടുത്തുന്നത് ഇതാദ്യമല്ല. 2021-ൽ, മഹീന്ദ്ര ഗ്രൂപ്പ് ചെയർമാൻ ആനന്ദ് മഹീന്ദ്രയും ക്രിപ്‌റ്റോകറൻസിയിൽ നിക്ഷേപം നടത്തിയെന്ന് അഭ്യൂഹങ്ങളുണ്ടായിരുന്നു. തുടർന്ന് ആനന്ദ് മഹീന്ദ്ര റിപ്പോർട്ടുകൾ നിഷേധിച്ചു.
