ഇത് രാഷ്ട്രീയം പറയാനുള്ള സമയമല്ല; രാജി ആവശ്യങ്ങൾക്കിടെ റെയിൽവേ മന്ത്രി
ഒഡീഷയിലെ ബാലസോർ ജില്ലയിൽ ഉണ്ടായ ദാരുണമായ മൂന്ന് ട്രെയിൻ അപകടത്തെത്തുടർന്ന് പുനരുദ്ധാരണ പ്രവർത്തനങ്ങളിലേക്ക് എല്ലാ ശ്രമങ്ങളും നയിക്കണമെന്ന് കേന്ദ്ര റെയിൽവേ മന്ത്രി അശ്വിനി വൈഷ്‌ണവ്. ഇത് രാഷ്ട്രീയം പറയാനുള്ള സമയമല്ല, പുനരുദ്ധാരണ പ്രവർത്തനങ്ങളിൽ ശ്രദ്ധ കേന്ദ്രീകരിക്കേണ്ട സമയമാണെന്നും അശ്വിനി വൈഷ്‌ണവ് പറഞ്ഞു.
അതേസമയം, അപകടത്തിൽ 288 പേരുടെ ജീവൻ നഷ്‌ടമാവുകയും 900ഓളം പേർക്ക് പരിക്കേൽക്കുകയും ചെയ്‌തതിന് പിന്നാലെ നിരവധി പ്രതിപക്ഷ പാർട്ടികളുടെ രാജി ആഹ്വാനത്തിനിടയിലാണ് റെയിൽവേ മന്ത്രിയുടെ ഈ പരാമർശം.
“ഞങ്ങളുടെ സംവിധാനങ്ങൾ വളരെ സുരക്ഷിതമാണെന്നും കാര്യമായ അപകടമൊന്നും സംഭവിക്കില്ലെന്നും റെയിൽവേ മന്ത്രി ആവർത്തിച്ച് പറയുമ്പോഴും ഇത് എങ്ങനെ സംഭവിച്ചു? ലാൽ ബഹദൂർ ശാസ്ത്രി നേരത്തെ ഒരു ട്രെയിൻ അപകടത്തിന് പിന്നാലെ തന്റെ മന്ത്രി സ്ഥാനം രാജിവച്ചിരുന്നു.
പ്രധാനമന്ത്രി മോദിയുടെ മന്ത്രിസഭയിൽ നിന്ന് അങ്ങിനെ ഞങ്ങൾ പ്രതീക്ഷിക്കുന്നില്ല, പക്ഷേ അദ്ദേഹത്തിന് (അശ്വിനി വൈഷ്‌ണവിന്) അൽപ്പം നാണക്കേട് തോന്നുന്നുണ്ടെങ്കിൽ അദ്ദേഹം രാജിവെക്കണം.” – കോൺഗ്രസ് നേതാവ് ദിഗ്‌വിജയ് സിംഗ് പറഞ്ഞു.
