54-ാം ജന്മദിനത്തിൽ രാഹുൽ ഗാന്ധി ‘വൈറ്റ് ടീ-ഷർട്ട്’ ക്യാമ്പയിൻ ആരംഭിച്ചു
കോൺഗ്രസ് എംപി രാഹുൽ ഗാന്ധി ബുധനാഴ്ച തൻ്റെ 54-ാം ജന്മദിനത്തോടനുബന്ധിച്ച് ‘വൈറ്റ് ടീ-ഷർട്ട്’ ക്യാമ്പയിൻ ആരംഭിച്ചു. “നിങ്ങളുടെ ജന്മദിനാശംസകൾക്ക് എല്ലാവർക്കും എൻ്റെ ഹൃദയംഗമമായ നന്ദി. ഞാൻ എപ്പോഴും ‘വെളുത്ത ടീ-ഷർട്ട്’ ധരിക്കുന്നത് എന്തുകൊണ്ടാണെന്ന് എന്നോട് പലപ്പോഴും ചോദിക്കാറുണ്ട് – ഈ ടി-ഷർട്ട് സുതാര്യത, ദൃഢത, ലാളിത്യം എന്നിവയെ പ്രതീകപ്പെടുത്തുന്നു..”- രാഹുൽ എക്സിൽ എഴുതി
“ഈ മൂല്യങ്ങൾ നിങ്ങളുടെ ജീവിതത്തിൽ എവിടെ, എത്രത്തോളം ഉപയോഗപ്രദമാണ്? #WhiteTshirtArmy ഉപയോഗിച്ച് ഒരു വീഡിയോയിൽ എന്നോട് പറയൂ. കൂടാതെ, ഞാൻ നിങ്ങൾക്ക് ഒരു വെളുത്ത ടി-ഷർട്ട് സമ്മാനിക്കും. എല്ലാവർക്കും ഒരുപാട് സ്നേഹം”, അദ്ദേഹം കൂട്ടിച്ചേർത്തു.
അതേസമയം ,ജന്മദിനത്തോടനുബന്ധിച്ച്, രാഹുൽ സഹോദരിയും പാർട്ടി നേതാവുമായ പ്രിയങ്ക ഗാന്ധി വധേരയ്ക്കൊപ്പം ഇന്ന് രാവിലെ ദേശീയ തലസ്ഥാനത്തെ പാർട്ടി ആസ്ഥാനം സന്ദർശിച്ചു. രാഹുൽ ഗാന്ധിക്ക് ജന്മദിനാശംസകൾ നേരുന്ന ഹോർഡിംഗുകളും ബാനറുകളും 10 ജൻപഥിലും (കോൺഗ്രസ് പാർലമെൻ്ററി പാർട്ടി അധ്യക്ഷ സോണിയ ഗാന്ധിയുടെ വസതി) ഡൽഹിയിലെ പാർട്ടി ആസ്ഥാനത്തും സ്ഥാപിച്ചിരുന്നു.
