തൃശ്ശൂര്‍ പൂരം അലങ്കോലമാക്കിയതില്‍ പൊലീസിന് വീഴ്ച ; അന്വേഷണ റിപ്പോര്‍ട്ട് പുറത്ത് വിടണം: വി.എസ്. സുനില്‍കുമാര്‍
ഈ വർഷത്തെ തൃശ്ശൂര്‍ പൂരം അലങ്കോലമാക്കിയതില്‍ സംസ്ഥാന പൊലീസിന് വീഴ്ച സംഭവിച്ചതായി വി.എസ്. സുനില്‍കുമാര്‍. ഈ കാര്യത്തിൽ എഡിജിപി എം.ആര്‍. അജിത്കുമാറിന്് വീഴ്ചയുണ്ടായോ എന്നതിന് തന്റെ കൈയ്യില്‍ തെളിവില്ലെന്നും പൂരം അലങ്കോലമാക്കിയതിന് പിന്നില്‍ രാഷ്ട്രീയ ലക്ഷ്യമാണുള്ളതെന്നും അദ്ദേഹം പറഞ്ഞു .
സംഭവത്തിന് പിന്നിൽ വലിയ ഗൂഢാലോചനയാണ് നടന്നിട്ടുള്ളത്. പോലീസിന്റെ അന്വേഷണ റിപ്പോര്‍ട്ട് പുറത്ത് വിടണമെന്നും വി.എസ്. സുനില്‍കുമാര്‍ ആവശ്യപ്പെട്ടു. പൊലീസിന്റെ ഭാഗത്തു നിന്നും കൃത്യവിലോപം ഉണ്ടായി. പൂരത്തിനൊപ്പം നിന്ന എന്നെ തന്നെ അന്ന് പ്രതികൂട്ടിലാക്കി ചര്‍ച്ചകളും പ്രചരണങ്ങളും നടന്നു.
ഇനി സത്യസ്ഥിതി പുറത്തു വരട്ടെ. ഈ കാര്യത്തിൽ അപ്പോള്‍ കൂടുതല്‍ പ്രതികരിക്കും . അടുത്ത ഒരു മാസം കൊണ്ട് പുറത്ത് വരുമെന്ന് പറഞ്ഞ റിപ്പോര്‍ട്ട് 4 മാസമായിട്ടും പുറത്ത് വന്നിട്ടില്ല, ജനങ്ങള്‍ക്ക് അത് അറിയാന്‍ താത്പര്യം ഉണ്ട്. തൃശ്ശൂര്‍ പൂരം തടസപ്പെടുത്തിയത് ഏത് ഉന്നതനായാലും അത് ജനങ്ങള്‍ അറിയണം. സംഭവത്തില്‍ റിപ്പോര്‍ട്ട് പുറത്ത് വിടണമെന്ന് ആവശ്യപ്പെട്ട് മുഖ്യമന്ത്രിക്ക് കത്ത് നല്‍കുമെന്നും വി.എസ്. സുനില്‍കുമാര്‍ കൂട്ടിച്ചേർത്തു .
