രജനികാന്തിനെ വച്ചൊരു സിനിമ സംവിധാനം ചെയ്യാൻ തോന്നിയിരുന്നു: മമ്മൂട്ടി
രജനികാന്തിനെ നായകനാക്കി തനിക്ക് ഒരു സിനിമ സംവിധാനം ചെയ്യാൻ തോന്നിയിരുന്നതായി മമ്മൂട്ടി. തന്റെ പുതിയ സിനിമയായ ‘നന്പകല് നേരത്ത് മയക്കം’ ചിത്രത്തിന്റെ പ്രമോഷന്റെ ഭാഗമായി നടന്ന പ്രസ് മീറ്റിലാണ് മമ്മൂട്ടി സംസാരിച്ചത്.
മണിരത്നം സംവിധാനം ചെയ്ത ‘ദളപതി’ എന്ന സിനിമയില് അഭിനയിച്ചതിന് ശേഷം തനിക്ക് സംവിധായകന് ആകാന് ആഗ്രഹം തോന്നിയതിനെ കുറിച്ചാണ് മമ്മൂട്ടി പറഞ്ഞത്.മലയാളത്തിൽ ‘ലോഹിതദാസ് ‘ഭൂതക്കണ്ണാടി’ എന്ന സിനിമ എഴുതിയ മമ്മൂക്കയ്ക്ക് സംവിധാനം ചെയ്യാന് വേണ്ടി ആയിരുന്നില്ലേ’ എന്ന ചോദ്യത്തോടാണ് താരം പ്രതികരിച്ചത്.
ആ സിനിമ തനിക്ക് വേണ്ടിയല്ല ലോഹിതദാസിന് സംവിധാനം ചെയ്യാന് വേണ്ടി തന്നെ എഴുതിയതാണ് എന്ന് പറഞ്ഞ ശേഷമാണ് തന്റെ സംവിധാന മോഹത്തെ കുറിച്ച് താരം പറഞ്ഞത്. ”രജനികാന്തിനെനായകനാക്കി ഒരു പടം ചെയ്യണമെന്ന് ഉണ്ടായിരുന്നു. അത് നടന്നില്ല. അത് പഴയ കഥ. അന്ന് ഞാന് രജനികാന്തിന്റെ കൂടെ ആ സിനിമയില് അഭിനയച്ചതോടെ വലിയ സൗഹൃദമായി. അങ്ങനെയങ്ങ് തോന്നിയതാണ് ആ കാലത്ത്” – മമ്മൂട്ടി പറഞ്ഞു.