കാന്തപുരത്തിന്റെ പരാമർശം അംഗീകരിക്കാനാവില്ല; സ്ത്രീകൾ വീടുകളിൽ ഒതുങ്ങിക്കഴിയേണ്ടവരല്ലെന്ന് മുഖ്യമന്ത്രി

സ്ത്രീകൾ വീടുകളിൽ അടങ്ങി ഒതുങ്ങി കഴിയേണ്ടവരല്ലെന്നും കാന്തപുരം എ.പി. അബൂബക്കർ മുസ്ലിയാർ നടത്തിയ പരാമർശങ്ങളോട് ഒരുതരത്തിലും യോജിക്കാൻ കഴിയില്ലെന്നും മുഖ്യമന്ത്രി വി.ഡി. സതീശൻ പറഞ്ഞു. 19-ാം നൂറ്റാണ്ടിൽ പറയേണ്ട കാര്യങ്ങളാണ് 21-ാം നൂറ്റാണ്ടിൽ ചിലർ ആവർത്തിക്കുന്നതെന്നും അദ്ദേഹം വിമർശിച്ചു.

കാന്തപുരത്തിന്റെ പ്രസ്താവനകളോട് കേരള സർക്കാരിനോ തങ്ങളുടെ പാർട്ടിക്കോ യാതൊരു തരത്തിലും യോജിപ്പില്ലെന്ന് മുഖ്യമന്ത്രി വ്യക്തമാക്കി. ഇത്തരം യാഥാസ്ഥിതിക നിലപാടുകൾ പുരോഗമന കേരള സമൂഹത്തിന് ചേർന്നതല്ലെന്നും ശക്തമായ എതിർപ്പാണ് തങ്ങൾ രേഖപ്പെടുത്തുന്നതെന്നും അദ്ദേഹം പറഞ്ഞു.

സ്ത്രീകളുടെ പൊതുപങ്കാളിത്തത്തെ ചോദ്യം ചെയ്യുന്ന ഇത്തരം പ്രസ്താവനകൾ ഇസ്ലാമിന്റെ ചരിത്രത്തെയും മൂല്യങ്ങളെയും തെറ്റായി വ്യാഖ്യാനിക്കുന്നതാണെന്നും മുഖ്യമന്ത്രി അഭിപ്രായപ്പെട്ടു. സ്ത്രീകളെ പൊതുജീവിതത്തിൽ നിന്ന് അകറ്റിനിർത്താനുള്ള ശ്രമങ്ങൾ ആധുനിക സമൂഹത്തിൽ അംഗീകരിക്കാനാവില്ലെന്നും അദ്ദേഹം കൂട്ടിച്ചേർത്തു.

നബിദിന റാലിയുടെ ഭാഗമായി വിവിധ ഇടങ്ങളിൽ സ്ത്രീകളുടെ സാന്നിധ്യം ശ്രദ്ധേയമായതിനെ തുടർന്നാണ് കാന്തപുരത്തെയും അദ്ദേഹത്തിന്റെ നേതൃത്വത്തിലുള്ള മതപണ്ഡിത സംഘടനയെയും ഇത് പ്രകോപിപ്പിച്ചതെന്നാണ് വിമർശനം. സ്ത്രീകളെ പൊതുവേദികളിൽ “പ്രദർശിപ്പിക്കരുത്” എന്നതടക്കമുള്ള വിവാദ നിർദേശങ്ങൾ കാന്തപുരം എ.പി. അബൂബക്കർ മുസ്ലിയാർ നയിക്കുന്ന ജംഇയ്യത്തുൽ ഉലമ പുറത്തിറക്കിയ സർക്കുലറിൽ ഉൾപ്പെട്ടിരുന്നു.

ഈ പരാമർശങ്ങൾക്കെതിരെ രാഷ്ട്രീയ-സാമൂഹിക രംഗങ്ങളിൽ വ്യാപക പ്രതിഷേധം ഉയരുന്നതിനിടെയാണ് മുഖ്യമന്ത്രിയുടെ പ്രതികരണം.