വിവാഹ മണ്ഡപത്തിൽ വെച്ച് വരൻ ചുംബിച്ചു; വധു വിവാഹം നിർത്തി

യുപിയിലെ സംഭാലിൽ വിവാഹ വേദിയിൽ വെച്ച് വരൻ ചുംബിച്ചതിനെ തുടർന്ന് യുവതി തന്റെ വിവാഹം നിർത്തിവച്ചു. തന്റെ സുഹൃത്തുക്കളുമായി ഒരു പന്തയത്തിൽ വിജയിക്കാൻ വരൻ തന്നെ നിർബന്ധപൂർവം ചുംബിച്ചെന്നും, ഇപ്പോൾ വരന്റെ സ്വഭാവത്തെക്കുറിച്ച് തനിക്ക് സംശയമുണ്ടെന്നും ബിരുദധാരിയായ 23 കാരി പറഞ്ഞു. തുടർന്ന് യുവതി പോലീസിൽ പരാതി നൽകുകയും ചെയ്തു.

ഞങ്ങൾ സ്റ്റേജിലിരിക്കുമ്പോൾ അവൻ എന്നെ അനുചിതമായി സ്പർശിച്ചു, പക്ഷേ ഞാൻ അത് അവഗണിച്ചു. പിന്നീട് അവൻ അപ്രതീക്ഷിതമായി ഒരു കാര്യം ചെയ്തു. ഞാൻ ഞെട്ടിപ്പോയി, അപമാനിക്കപ്പെട്ടു. എന്റെ ആത്മാഭിമാനം അദ്ദേഹം കാര്യമാക്കാതെ നിരവധി അതിഥികൾക്ക് മുന്നിൽ മോശമായി പെരുമാറി. ഭാവിയിൽ അവൻ എങ്ങനെ പെരുമാറും? ഞാൻ അവന്റെ കൂടെ പോകേണ്ടെന്ന് തീരുമാനിച്ചു- യുവതി പോലീസിനോട് പറഞ്ഞു.

സംഭവം നടന്ന സമയത്ത് ആചാരപ്രകാരമുള്ള വിവാഹം നടന്നിരുന്നതിനാൽ സാങ്കേതികമായി ദമ്പതികൾ വിവാഹിതരായി എന്നാണു പോലീസ് പറയുന്നത്. പോലീസ് മധ്യസ്ഥതയ്ക്ക് ശ്രമിച്ചെങ്കിലും വധു വഴങ്ങിയില്ല എന്നും റിപ്പോർട്ടുണ്ട്.