28 ദിവസത്തെ റീച്ചാർജിന് പകരം 30 ദിവസം; മൊബൈൽ ഉപഭോക്താക്കൾക്ക് പുതിയ മാറ്റം
രാജ്യത്തെ മൊബൈൽ ഉപഭോക്താക്കൾക്ക് ആശ്വാസമേകുന്ന നിർണായക മാറ്റവുമായി ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്). 28 ദിവസത്തെ വാലിഡിറ്റിയുള്ള റീച്ചാർജ് പ്ലാനുകൾക്ക് പകരം 30 ദിവസത്തെ പൂർണ വാലിഡിറ്റിയുള്ള പ്ലാനുകൾ ലഭ്യമാക്കുന്നതിനുള്ള വ്യവസ്ഥകൾ നടപ്പാക്കുകയാണ് പുതിയ നീക്കത്തിലൂടെ ലക്ഷ്യമിടുന്നത്.
നിലവിൽ പല ടെലികോം കമ്പനികളും ‘ഒരു മാസത്തെ റീച്ചാർജ്’ എന്ന പേരിൽ 28 ദിവസത്തെ കാലാവധിയുള്ള പ്ലാനുകളാണ് നൽകുന്നത്. ഇതുമൂലം ഉപഭോക്താക്കൾക്ക് ഓരോ മാസവും രണ്ട് ദിവസത്തോളം വാലിഡിറ്റി നഷ്ടപ്പെടുകയും ഒരു വർഷം 365 ദിവസത്തേക്ക് 12 റീച്ചാർജുകൾക്ക് പകരം 13 തവണ റീച്ചാർജ് ചെയ്യേണ്ട സാഹചര്യം ഉണ്ടാകുകയും ചെയ്യുന്നുവെന്ന പരാതിയുണ്ട്.
പുതിയ വ്യവസ്ഥകൾ പ്രാബല്യത്തിൽ വരുന്നതോടെ 30 ദിവസത്തെ വാലിഡിറ്റിയുള്ള പ്ലാനുകൾ ലഭ്യമാകുകയും ഓരോ മാസവും നിശ്ചിത തീയതിയിൽ റീച്ചാർജ് പുതുക്കാനുള്ള സൗകര്യം ലഭിക്കുകയും ചെയ്യും. ഇതിലൂടെ ഉപഭോക്താക്കളുടെ വാർഷിക റീച്ചാർജ് ചെലവിൽ കുറവുണ്ടാകുമെന്നാണ് പ്രതീക്ഷ.
ഇന്റർനെറ്റ് ഡാറ്റ ആവശ്യമില്ലാത്ത ഉപഭോക്താക്കൾക്കായി വോയ്സ് കോളുകളും എസ്എംഎസും മാത്രം ഉൾപ്പെടുന്ന പ്ലാനുകൾ ലഭ്യമാക്കാനും ടെലികോം കമ്പനികളോട് നിർദേശിച്ചിട്ടുണ്ട്. ഇതോടെ ഡാറ്റ ഉപയോഗിക്കാത്തവർക്ക് ആവശ്യത്തിനനുസരിച്ചുള്ള കുറഞ്ഞ ചെലവിലുള്ള പ്ലാനുകൾ തിരഞ്ഞെടുക്കാൻ സാധിക്കും.
മുതിർന്ന പൗരന്മാർക്കും സാധാരണ ഫോണുകൾ ഉപയോഗിക്കുന്നവർക്കും വോയ്സ്, എസ്എംഎസ് അധിഷ്ഠിത പ്ലാനുകൾ പ്രയോജനപ്പെടും. ഉപയോഗിക്കാത്ത ഡാറ്റയ്ക്കായി അധിക തുക ചെലവഴിക്കേണ്ട സാഹചര്യം ഇതിലൂടെ ഒഴിവാക്കാനാകുമെന്നാണ് വിലയിരുത്തൽ.
റീച്ചാർജ് വാലിഡിറ്റിയുമായി ബന്ധപ്പെട്ട ഉപഭോക്താക്കളുടെ പരാതികൾക്കും ആവശ്യങ്ങൾക്കും പരിഹാരമാകുന്ന തരത്തിലാണ് പുതിയ മാറ്റം. വരും ദിവസങ്ങളിൽ ടെലികോം ഓപ്പറേറ്റർമാർ 30 ദിവസത്തെ വാലിഡിറ്റിയുള്ള പ്ലാനുകളും വോയ്സ്-ഒൺലി പാക്കുകളും തങ്ങളുടെ സേവനങ്ങളിൽ ഉൾപ്പെടുത്തുമെന്നാണ് പ്രതീക്ഷിക്കുന്നത്.
