കേന്ദ്രത്തിന് പൂർണ്ണ പിന്തുണ, മുൻ സർക്കാരിന് രൂക്ഷ വിമർശനം; സതീശൻ സർക്കാരിന്റെ നയപ്രഖ്യാപനത്തിൽ ‘കേന്ദ്രവിരുദ്ധ’ വരികളില്ല

കേരളത്തിൽ പുതുതായി അധികാരമേറ്റ യു.ഡി.എഫ് സർക്കാരിന്റെ ആദ്യ നയപ്രഖ്യാപന പ്രസംഗം രാഷ്ട്രീയ കേന്ദ്രങ്ങളിൽ വലിയ ചർച്ചയാകുന്നു. മുൻ ഇടതുപക്ഷ സർക്കാരിന്റെ നയങ്ങളിൽ നിന്ന് വ്യത്യസ്തമായി, കേന്ദ്ര സർക്കാരിനെ പൂർണ്ണമായി തഴുകിയും മുൻ പിണറായി വിജയൻ സർക്കാരിനെ രൂക്ഷമായി വിമർശിച്ചുമുള്ളതാണ് പുതിയ കോൺഗ്രസ് സർക്കാരിന്റെ നയപ്രഖ്യാപനം. പ്രസംഗത്തിലുടനീളം കേന്ദ്രത്തിനെതിരെ ഒരു വരി പോലും വിമർശനമില്ല എന്നത് ശ്രദ്ധേയമാണ്.

സംസ്ഥാനത്തിന്റെ സാമ്പത്തിക മേഖല പൂർണ്ണമായും തകർന്നടിഞ്ഞ നിലയിലാണെന്ന് നയപ്രഖ്യാപനത്തിൽ ഗവർണർ രാജേന്ദ്ര വിശ്വനാഥ് അർലേക്കർ ചൂണ്ടിക്കാട്ടി. ആരോഗ്യ മേഖലയുമായി ബന്ധപ്പെട്ട് മുൻ സർക്കാരിന്റെ പ്രവർത്തനങ്ങളെക്കുറിച്ച് കടുത്ത വിമർശനവും നയപ്രഖ്യാപനത്തിലുണ്ട്.

കഴിഞ്ഞ എൽ.ഡി.എഫ് സർക്കാരിന്റെ കാലത്തെ നയപ്രഖ്യാപന പ്രസംഗങ്ങളിൽ കേന്ദ്രവിരുദ്ധ പരാമർശങ്ങൾ ഗവർണർ വായിക്കാതിരിക്കുകയും ചില ഭാഗങ്ങൾ സ്വന്തമായി കൂട്ടിച്ചേർക്കുകയും ചെയ്തത് വലിയ വിവാദമായിരുന്നു. അന്ന് മുഖ്യമന്ത്രിയായിരുന്ന പിണറായി വിജയൻ സഭയിൽ തന്നെ ഇത് തിരുത്താൻ ആവശ്യപ്പെട്ടിരുന്നു.

എന്നാൽ, പുതിയ സതീശൻ സർക്കാരിന്റെ നയപ്രഖ്യാപനത്തിൽ കേന്ദ്ര സർക്കാരുമായി പൂർണ്ണമായി സഹകരിച്ച് മുന്നോട്ട് പോകുമെന്നാണ് വ്യക്തമാക്കുന്നത്. കേരളത്തിന്റെ വികസനത്തിനായി കേന്ദ്രത്തിന്റെ ന്യായവും അർഹവുമായ പിന്തുണ സംസ്ഥാനം പ്രതീക്ഷിക്കുന്നതായി പ്രസംഗത്തിൽ പ്രത്യേകം പ്രതിപാദിച്ചിട്ടുണ്ട്.

തിരഞ്ഞെടുപ്പ് കാലത്ത് കോൺഗ്രസ് ജനങ്ങൾക്ക് നൽകിയ വാഗ്ദാനമായ ‘ഇന്ദിരാ ഗ്യാരണ്ടി’ പദ്ധതികളുമായി സർക്കാർ ശക്തമായി മുന്നോട്ട് പോകുമെന്ന് നയപ്രഖ്യാപനത്തിൽ ആവർത്തിച്ചു. പൊതുവിദ്യാഭ്യാസ രംഗം ഉൾപ്പെടെയുള്ള മേഖലകളിൽ വിപ്ലവകരമായ മാറ്റങ്ങൾ കൊണ്ടുവരുമെന്ന് പ്രഖ്യാപനത്തിൽ പറയുന്നുണ്ടെങ്കിലും, കോൺഗ്രസ് സർക്കാർ പൊതുവിദ്യാഭ്യാസ രംഗത്തെ തകർക്കാനാണ് ശ്രമിക്കുന്നതെന്ന ആരോപണവുമായി മുൻ വിദ്യാഭ്യാസ മന്ത്രി വി. ശിവൻകുട്ടി രംഗത്തെത്തിയിട്ടുണ്ട്.

കേന്ദ്രവുമായുള്ള പുതിയ സൗഹൃദ അന്തരീക്ഷം സംസ്ഥാനത്തിന്റെ സാമ്പത്തിക പ്രതിസന്ധി മറികടക്കാൻ സഹായിക്കുമെന്ന പ്രതീക്ഷയിലാണ് ഭരണപക്ഷം.