കാലടി സർവകലാശാലയിലെ വിദ്യാർഥി സമരത്തിന് പിന്തുണയുമായി പിണറായി; യുഡിഎഫിനെതിരെ വിമർശനം

കാലടി ശ്രീ ശങ്കരാചാര്യ സംസ്കൃത സർവകലാശാലയിലെ വിദ്യാർഥി സമരത്തിന് പിന്തുണ പ്രഖ്യാപിച്ച് പ്രതിപക്ഷ നേതാവ് പിണറായി വിജയൻ. ഉന്നതവിദ്യാഭ്യാസ മേഖലയെ സംഘപരിവാർ അജണ്ടകൾക്ക് വിട്ടുകൊടുക്കുന്ന യുഡിഎഫിന്റെ നിലപാടിന്റെ ഒടുവിലത്തെ ഉദാഹരണമാണ് കാലടിയിൽ കാണുന്നതെന്ന് അദ്ദേഹം സമൂഹമാധ്യമത്തിൽ കുറിച്ചു. സമരം ചെയ്യുന്ന വിദ്യാർഥികളെ അപരിഷ്കൃതരെന്ന് മുദ്രകുത്താൻ ഉന്നതവിദ്യാഭ്യാസ മന്ത്രിയും ഗവർണറുടെ നോമിനിയായ വൈസ് ചാൻസലറും മത്സരിക്കുകയാണെന്നും ജനാധിപത്യ ശബ്ദങ്ങളെ അടിച്ചമർത്താൻ മുഖ്യമന്ത്രി രംഗത്തിറങ്ങിയെന്നും അദ്ദേഹം ആരോപിച്ചു.

ന്യായമായ അവകാശങ്ങൾക്കായി ജനാധിപത്യപരമായി പ്രതിഷേധിച്ച വിദ്യാർഥികളെ സർവകലാശാലയിൽനിന്ന് മാറ്റിനിർത്തിയിട്ട് 66 ദിവസം പിന്നിട്ടതായി പിണറായി ചൂണ്ടിക്കാട്ടി. അടിസ്ഥാന സൗകര്യങ്ങൾ ഉറപ്പാക്കണമെന്നും മുടങ്ങിക്കിടക്കുന്ന ഫെലോഷിപ്പുകൾ അനുവദിക്കണമെന്നും ആവശ്യപ്പെട്ട് വിദ്യാർഥികൾ സമാധാനപരമായി തെരുവുനാടകം അവതരിപ്പിക്കുകയായിരുന്നുവെന്ന് അദ്ദേഹം പറഞ്ഞു. പ്രതിഷേധ നാടകത്തിൽ തെളിയാത്ത ലൈറ്റിന്റെ പ്രതീകാത്മക ശവസംസ്കാരം നടത്തിയതിനെ വൈസ് ചാൻസലറുടെ ശവസംസ്കാരമായി വ്യാഖ്യാനിച്ചെന്നും തുടർന്ന് വിദ്യാർഥികൾക്കെതിരെ അക്രമം, സ്ത്രീത്വത്തെ അപമാനിക്കൽ തുടങ്ങിയ ആരോപണങ്ങളിൽ കേസുകളെടുത്തെന്നും അദ്ദേഹം ആരോപിച്ചു.

വിദ്യാർഥികൾക്കെതിരെ തെളിവുകളില്ലെന്ന് അന്വേഷണസമിതി അംഗം റിപ്പോർട്ട് നൽകിയിട്ടും ഹൈക്കോടതി സിംഗിൾ ബെഞ്ച് പരീക്ഷയെഴുതാൻ അനുമതി നൽകിയിട്ടും വൈസ് ചാൻസലർ ഉത്തരവിനെതിരെ അപ്പീൽ നൽകിയതിനെ പിണറായി വിമർശിച്ചു. മാപ്പെഴുതി നൽകിയാൽ തിരിച്ചെടുക്കാമെന്ന അധികൃതരുടെ നിലപാട് തള്ളിയാണ് വിദ്യാർഥികൾ സർവകലാശാലാ കവാടത്തിൽ നിരാഹാര സമരം തുടരുന്നതെന്നും അദ്ദേഹം പറഞ്ഞു. വിദ്യാർഥികളുടെ സമരത്തിന് പൊതുസമൂഹത്തിന്റെ പിന്തുണയുണ്ടെന്നും ക്യാമ്പസ് ജനാധിപത്യം സംരക്ഷിക്കാനുള്ള പോരാട്ടത്തിൽ അവർക്കൊപ്പമാണെന്നും പിണറായി വ്യക്തമാക്കി.