ഒരുപാട് ഹീറോസിന്റെ കൂടെ അഭിനയിച്ചിട്ടുണ്ട്; എന്നാൽ മമ്മൂട്ടി സാർ വളരെ സ്പെഷ്യലായി തോന്നി: ജ്യോതിക

മമ്മൂട്ടിയും ജ്യോതികയും ആദ്യമായി ഒരുമിക്കുന്ന കാതൽ എന്ന സിനിമയുടെ റിലീസിനായി കാത്തിരിക്കുകയാണ് സിനിമാ ലോകം. നവമ്പർ 23നാണ് ചിത്രം പ്രദർശനത്തിനെത്തുന്നത്. ഇപ്പോഴിതാ മമ്മൂട്ടിയ്‌ക്കൊപ്പമുള്ള തന്റെ അനുഭവം വെളിപ്പെടുത്തുകയാണ് ജ്യോതിക.

നിർമ്മാണ കമ്പനിയായ മമ്മൂട്ടി കമ്പനിയ്‌ക്കൊപ്പം ജോലി ചെയ്യാൻ കഴിഞ്ഞതിൽ സന്തോഷമുണ്ടെന്ന് ജ്യോതിക പറഞ്ഞു. ധാരാളം നടന്മാർക്കൊപ്പം അഭിനയിച്ചിട്ടുണ്ടെങ്കിലും മമ്മൂട്ടിയോടൊപ്പം അഭിനയിച്ചത് തനിക്കിക് വളരെ സ്‌പെഷ്യലാണെന്നും ജ്യോതിക പറഞ്ഞു.

ഇപ്പോൾ വലിയൊരു നിലയിലാണെങ്കിലും അദ്ദേഹം ഇപ്പോഴും പരീക്ഷണങ്ങൾ ചെയ്യാൻ തയ്യാറാകുന്നുണ്ടെന്നും ജ്യോതിക കൂട്ടിച്ചേർത്തു. കാതലിന്റെ പ്രമോഷന്റെ ഭാഗമായി നൽകിയ അഭിമുഖത്തിൽ സംസാരിക്കുകയായിരുന്നു ജ്യോതിക.

ജ്യോതികയുടെ വാക്കുകൾ: ‘മമ്മൂട്ടി കമ്പനിക്കൊപ്പം വർക്ക് ചെയ്യുന്നതിൽ വളരെ സന്തോഷമുണ്ട്. കഴിഞ്ഞ ആഴ്ചയാണ് ഞാൻ കണ്ണൂർ സ്‌ക്വാഡ് കണ്ടത്. എന്ത് തരം സിനിമയാണ് അവർ നിർമ്മിച്ചിരിക്കുന്നത് എന്ന് അത്ഭുതം തോന്നി. ഒരു കാര്യം തുറന്ന് പറയുകയാണെങ്കിൽ ഒരുപാട് ഹീറോസിന്റെ കൂടെ അഭിനയിച്ചിട്ടുണ്ട്. എന്നാൽ മമ്മൂട്ടി സാർ വളരെ സ്പെഷ്യലായി തോന്നി.

വെറുതേ അദ്ദേഹത്തിനൊപ്പം ഇരിക്കുന്നതുകൊണ്ട് പറയുന്നതല്ല. ഇപ്പോൾ എത്തിനിൽക്കുന്ന ഘട്ടത്തിലും അദ്ദേഹം പരീക്ഷണങ്ങൾ ചെയ്യാൻ തയാറാണ്. ഒരുപാട് വ്യത്യസ്തമായ സിനികൾ ചെയ്യുന്നു. ഇത്ര വലിയ ഘട്ടത്തിലെത്തിയിട്ടും പരീക്ഷണം ചെയ്യുന്നവരാണ് യഥാർത്ഥ ഹീറോ. ഈ സിനിമയിൽ എന്നെ കാസ്റ്റ് ചെയ്തതിന് വളരെ നന്ദി.’ ജ്യോതിക പറഞ്ഞു.