വിദ്യാർഥി സമരം ശക്തമായപ്പോൾ പ്രതിപക്ഷവും ഒപ്പം; ദേശീയ രാഷ്ട്രീയത്തിന്റെ കേന്ദ്രമായി ജന്തർ മന്തർ
ജന്തർ മന്തറിൽ വിദ്യാർഥികൾ ആരംഭിച്ച പ്രതിഷേധം ദേശീയ ശ്രദ്ധ നേടുകയും ജനപിന്തുണ വർധിക്കുകയും ചെയ്തതോടെ വിവിധ പ്രതിപക്ഷ പാർട്ടികൾക്കും നിലപാട് പുനഃപരിശോധിക്കേണ്ട സാഹചര്യം രൂപപ്പെട്ടു. സമരത്തിന്റെ ആദ്യഘട്ടത്തിൽ അകലം പാലിച്ചിരുന്ന പല രാഷ്ട്രീയ കക്ഷികളും പിന്നീട് വിദ്യാർഥികളുടെ ആവശ്യങ്ങൾക്ക് പരസ്യ പിന്തുണ പ്രഖ്യാപിച്ച് രംഗത്തെത്തി.
സമരം ആരംഭിച്ച ദിവസങ്ങളിൽ തന്നെ ഇടതുപക്ഷ വിദ്യാർഥി സംഘടനകൾ പ്രക്ഷോഭത്തിന് ഒപ്പമുണ്ടായിരുന്നു. എസ്.എഫ്.ഐ, എ.ഐ.എസ്.എ ഉൾപ്പെടെയുള്ള സംഘടനകൾ ആദ്യ ദിവസം മുതൽ സമരത്തിന് പിന്തുണ നൽകുകയും സമരവേദിയിൽ സജീവ സാന്നിധ്യം ഉറപ്പാക്കുകയും ചെയ്തു. തുടർന്ന് സി.പി.ഐ.എം, സി.പി.ഐ, ആം ആദ്മി പാർട്ടി തുടങ്ങിയ രാഷ്ട്രീയ കക്ഷികളും വിദ്യാർഥികളുടെ ആവശ്യങ്ങൾക്ക് പിന്തുണ പ്രഖ്യാപിച്ചു.
ജന്തർ മന്തർ രാജ്യത്ത് കേന്ദ്ര സർക്കാരിനെതിരെ പ്രതിഷേധങ്ങൾ സംഘടിപ്പിക്കുന്ന പ്രധാന വേദികളിലൊന്നാണ്. കഴിഞ്ഞ ഒരു ദശാബ്ദത്തിലേറെയായി ചെറുതും വലുതുമായ നിരവധി ജനകീയ സമരങ്ങൾ ഇവിടെ അരങ്ങേറിയിട്ടുണ്ട്. തുടക്കത്തിൽ പരിമിതമായ പിന്തുണയോടെ ആരംഭിച്ച ഈ വിദ്യാർഥി പ്രക്ഷോഭം പിന്നീട് ദേശീയ രാഷ്ട്രീയ ചർച്ചകളുടെ കേന്ദ്രബിന്ദുവായി മാറി.
ഭരണഘടനയുടെയും ഡോ. ബി.ആർ. അംബേദ്കറിന്റെയും ആശയങ്ങൾ ഉയർത്തിപ്പിടിച്ചുകൊണ്ട് ആരംഭിച്ച സമരത്തെ ആദ്യഘട്ടത്തിൽ ഭരണകക്ഷിയായ ബി.ജെ.പിയോടൊപ്പം പ്രതിപക്ഷത്തിലെ ചില മുഖ്യധാരാ കക്ഷികളും ഗൗരവമായി പരിഗണിച്ചിരുന്നില്ല. എന്നാൽ സമരത്തിന് രാജ്യവ്യാപക പിന്തുണ ലഭിച്ചതോടെ രാഷ്ട്രീയ സാഹചര്യത്തിലും മാറ്റം പ്രകടമായി.
പാർലമെന്റ് മാർച്ചിനിടെ ഉണ്ടായ പൊലീസ് നടപടിയിൽ പ്രതിഷേധിച്ച് സി.പി.ഐ.എം ജനറൽ സെക്രട്ടറി എം.എ. ബേബി ഉൾപ്പെടെയുള്ള നേതാക്കൾ ജന്തർ മന്തറിലെ സമരവേദിയിലെത്തി ഐക്യദാർഢ്യം പ്രകടിപ്പിച്ചു. സമാജ്വാദി പാർട്ടി അധ്യക്ഷൻ അഖിലേഷ് യാദവും വിദ്യാർഥികൾക്കെതിരായ പൊലീസ് നടപടിയെ പാർലമെന്റിലും പൊതുവേദികളിലും ശക്തമായി വിമർശിച്ചു. വിദ്യാർഥികളുടെ ആവശ്യങ്ങൾ ന്യായമാണെന്ന് ചൂണ്ടിക്കാട്ടി ശിവസേന (ഉദ്ധവ് താക്കറെ വിഭാഗം) പിന്തുണ അറിയിക്കുകയും ചെയ്തു.
അതേസമയം, കോൺഗ്രസിന്റെ നിലപാട് ആദ്യഘട്ടത്തിൽ വ്യക്തമായിരുന്നില്ല. നിരാഹാര സമരത്തിലിരുന്ന സോനം വാങ്ചുക്കിനെ കോൺഗ്രസ് നേതാവ് പവൻ ഖേര നേരിട്ട് സന്ദർശിച്ചിരുന്നെങ്കിലും പാർട്ടി നേതൃത്വം വ്യത്യസ്തമായ രാഷ്ട്രീയ സമീപനമാണ് സ്വീകരിച്ചത്. പിന്നീട് സമരത്തിന് ലഭിച്ച ജനപിന്തുണയും ദേശീയ ശ്രദ്ധയും വിലയിരുത്തിയ കോൺഗ്രസ്, വിദ്യാർഥികളുടെ ആവശ്യങ്ങൾക്ക് പിന്തുണ പ്രഖ്യാപിച്ചുകൊണ്ട് സ്വന്തം പ്രതിഷേധ പരിപാടികൾ സംഘടിപ്പിക്കാൻ തീരുമാനിച്ചു.
രാഹുൽ ഗാന്ധിയുടെ നേതൃത്വത്തിൽ കോൺഗ്രസ് പ്രതിഷേധം ശക്തമാക്കിയെങ്കിലും വിദ്യാർഥികളുടെ സമരവേദിയിൽ നേരിട്ട് ചേർന്ന് പ്രവർത്തിക്കുന്നതിനുപകരം സ്വതന്ത്ര പ്രതിഷേധങ്ങളിലൂടെയാണ് പിന്തുണ പ്രകടിപ്പിച്ചത്. വിദ്യാർഥികളുടെ ആവശ്യങ്ങൾ ന്യായമാണെന്നും അവരുടെ പോരാട്ടത്തോട് ഐക്യദാർഢ്യമുണ്ടെന്നും വ്യക്തമാക്കിയ കോൺഗ്രസ്, സമാന്തര പ്രക്ഷോഭങ്ങളിലൂടെ പിന്തുണ നൽകുന്ന നിലപാടാണ് സ്വീകരിച്ചത്.
ജന്തർ മന്തറിൽ ആരംഭിച്ച വിദ്യാർഥി സമരം പിന്നീട് വിവിധ രാഷ്ട്രീയ കക്ഷികളെ ഒരേ വേദിയിൽ എത്തിക്കുകയും ദേശീയ രാഷ്ട്രീയ ചർച്ചകളെ സ്വാധീനിക്കുകയും ചെയ്ത പ്രധാന ജനകീയ പ്രക്ഷോഭങ്ങളിലൊന്നായി മാറിയെന്ന വിലയിരുത്തലാണ് രാഷ്ട്രീയ നിരീക്ഷകർ മുന്നോട്ടുവയ്ക്കുന്നത്.
