ബഹ്റൈനിലെ യുഎസ് സൈനിക താവളത്തിന് നേരെ ഇറാൻ ആക്രമണം; വൻ നാശനഷ്ടമെന്ന് റിപ്പോർട്ട്
ബഹ്റൈനിലെ യുഎസ് സൈനിക താവളത്തിന് നേരെ ഇറാൻ നടത്തിയ ആക്രമണത്തിൽ വൻ നാശനഷ്ടമുണ്ടായതായി യുഎസ് സൈനിക ഉദ്യോഗസ്ഥരെ ഉദ്ധരിച്ച് റിപ്പോർട്ട്. ബാലിസ്റ്റിക് മിസൈലുകളും ഡ്രോണുകളും ഉപയോഗിച്ചായിരുന്നു ആക്രമണം. താവളത്തിലെ പ്രധാന അടിസ്ഥാന സൗകര്യങ്ങൾക്കും ആശയവിനിമയ സംവിധാനങ്ങൾക്കും കെട്ടിടങ്ങൾക്കും കേടുപാടുകൾ സംഭവിച്ചതായാണ് വിവരം.
അമേരിക്കൻ അഞ്ചാം നാവികപ്പടയുടെ ആസ്ഥാനം സ്ഥിതി ചെയ്യുന്ന ബഹ്റൈനിലെ തന്ത്രപ്രധാനമായ സൈനിക കേന്ദ്രത്തിന് നേരെയുണ്ടായ ആക്രമണം ഗൾഫ് മേഖലയിലെ സുരക്ഷാ സ്ഥിതിഗതികൾ കൂടുതൽ സങ്കീർണമാക്കിയിട്ടുണ്ട്. ആക്രമണ സമയത്ത് മുന്നറിയിപ്പ് സൈറണുകൾ മുഴങ്ങിയെങ്കിലും എല്ലാ മിസൈലുകളും തടയാൻ സാധിച്ചില്ലെന്നാണ് റിപ്പോർട്ടുകൾ.
ആക്രമണത്തിൽ സൈനികർക്ക് പരിക്കേറ്റിട്ടുണ്ടോ എന്ന കാര്യത്തിൽ ഔദ്യോഗിക സ്ഥിരീകരണം ലഭിച്ചിട്ടില്ല. താവളത്തിനുള്ളിൽ തീപിടിത്തമുണ്ടായതായും ഉപഗ്രഹ ചിത്രങ്ങൾ സൂചിപ്പിക്കുന്നതായി റിപ്പോർട്ടുകളുണ്ട്.
അമേരിക്ക–ഇസ്രയേൽ സൈനിക നീക്കങ്ങൾക്ക് മറുപടിയായാണ് ഇറാൻ ആക്രമണം ശക്തമാക്കുന്നതെന്നാണ് വിലയിരുത്തൽ. ബഹ്റൈൻ താവളത്തിന് നേരെയുണ്ടായ ആക്രമണം ഗൾഫ് മേഖലയിലെ അമേരിക്കൻ സൈനിക വിന്യാസത്തിനും കപ്പൽ ഗതാഗത സുരക്ഷയ്ക്കും വെല്ലുവിളിയാകുമെന്നാണ് വിലയിരുത്തൽ. ഹോർമുസ് കടലിടുക്കിലെയും ചെങ്കടലിലെയും സുരക്ഷയെക്കുറിച്ചുള്ള ആശങ്കയും ഇതോടെ ശക്തമായിട്ടുണ്ട്.
ഇറാന് തിരിച്ചടി നൽകുന്നതിനുള്ള സാധ്യതകൾ സംബന്ധിച്ച് അമേരിക്കൻ പ്രസിഡന്റ് ഡൊണാൾഡ് ട്രംപ് ഉന്നത സൈനിക ഉദ്യോഗസ്ഥരുമായി ചർച്ച നടത്തുന്നതായാണ് റിപ്പോർട്ട്. ആക്രമണങ്ങളുടെ തുടർച്ച പശ്ചിമേഷ്യൻ സംഘർഷം കൂടുതൽ രൂക്ഷമാക്കുമെന്ന ആശങ്കയും നിലനിൽക്കുന്നു.
