കൊൽക്കത്തയിൽ ഇന്ത്യ–ബ്രസീൽ പോരാട്ടം; ഫുട്ബോൾ ആരാധകരെ ആവേശത്തിലാഴ്ത്തി റിപ്പോർട്ടുകൾ
ഇന്ത്യൻ ഫുട്ബോൾ ആരാധകരെ ആവേശത്തിലാഴ്ത്തുന്ന ഒരു വമ്പൻ മത്സരത്തിനാണ് സാധ്യത തെളിയുന്നത്. അഞ്ച് തവണ ലോക ചാമ്പ്യൻമാരായ ബ്രസീൽ ദേശീയ ടീം ഒക്ടോബർ 3ന് കൊൽക്കത്തയിൽ ഇന്ത്യയെ നേരിടുമെന്നാണ് റിപ്പോർട്ടുകൾ.
ബ്രസീലിയൻ മാധ്യമമായ ജിഇ ഗ്ലോബോയുടെ റിപ്പോർട്ട് പ്രകാരം, 2026ലെ അന്താരാഷ്ട്ര മത്സര കലണ്ടർ ഓസ്ട്രേലിയയിൽ രണ്ട് സൗഹൃദ മത്സരങ്ങളും ഇന്ത്യയ്ക്കെതിരായ ഒരു മത്സരവും ഉൾപ്പെടുത്തി പൂർത്തിയാക്കാനാണ് ബ്രസീലിന്റെ പദ്ധതി. സെപ്റ്റംബർ 25നും 29നും ഓസ്ട്രേലിയക്കെതിരെ ടൗൺസ്വില്ലിലും ബ്രിസ്ബേനിലും ബ്രസീൽ കളിക്കുമെന്നത് നേരത്തെ സ്ഥിരീകരിച്ചിരുന്നു.
ഇതിന് പിന്നാലെ ഒക്ടോബറിലെ ഫിഫ അന്താരാഷ്ട്ര വിൻഡോയിൽ ബ്രസീലിന്റെ മൂന്നാമത്തെ മത്സരം കൊൽക്കത്തയിലെ യൂബ ഭാരതി ക്രീഡാംഗണത്തിൽ ഇന്ത്യയ്ക്കെതിരെയായിരിക്കുമെന്നാണ് പുതിയ റിപ്പോർട്ടുകൾ സൂചിപ്പിക്കുന്നത്.
മത്സരം ഔദ്യോഗികമായി സ്ഥിരീകരിക്കപ്പെട്ടാൽ ഇന്ത്യൻ ഫുട്ബോൾ ചരിത്രത്തിലെ ഏറ്റവും ശ്രദ്ധേയമായ അന്താരാഷ്ട്ര പോരാട്ടങ്ങളിലൊന്നായി ഇത് മാറും. ലോക ഫുട്ബോളിലെ ശക്തരായ എതിരാളികൾക്കെതിരെ സ്വന്തം മികവ് തെളിയിക്കാനുള്ള അപൂർവ അവസരമാണ് ഇന്ത്യൻ ടീമിന് ലഭിക്കുക. അതേസമയം, ബ്രസീലിന്റെ പ്രശസ്ത താരങ്ങളെയും അവരുടെ കളിശൈലിയെയും നേരിൽ കാണാനുള്ള അവസരവും ഇന്ത്യൻ ആരാധകർക്ക് ഒരുങ്ങും.
ഫുട്ബോൾ പ്രേമികളുടെ കണ്ണുകൾ ഇപ്പോൾ ഈ മത്സരത്തിന്റെ ഔദ്യോഗിക പ്രഖ്യാപനത്തിലേക്കാണ്.
