വാട്ട്സ്‌ആപ്പില്‍ അയച്ച മെസെജില്‍ തെറ്റുണ്ടെന്ന് കരുതി ഡീലിറ്റാക്കേണ്ട; വാട്ട്സ്‌ആപ്പില്‍ പുതിയ കിടിലന്‍ ഫീച്ചര്‍.!
വാട്ട്സ്‌ആപ്പില്‍ അയച്ച മെസെജില്‍ തെറ്റുണ്ടെന്ന് കരുതി ഡീലിറ്റാക്കേണ്ടതില്ല. അയച്ച മെസെജ് 15 മിനിറ്റിനുള്ളില്‍ എഡിറ്റ് ചെയ്യാനുള്ള ഫീച്ചറുമായി എത്തുകയാണ് വാട്ട്സാപ്പ്.
ആപ്പിള്‍ ഐമെസേജിലും ടെലഗ്രാമിലും സന്ദേശങ്ങള്‍ എഡിറ്റ് ചെയ്യാനുള്ള സൗകര്യം ഇതിനോടകം ലഭ്യമാക്കിയിട്ടുണ്ട്.
നേരത്തെ തന്നെ പറഞ്ഞു കേട്ട ഈ ഫീച്ചറിനെക്കുറിച്ച്‌ പുതിയ വിവരം നല്‍കിയിരിക്കുന്നത് വാട്ട്സ്ആപ്പ് ബീറ്റ ഇന്‍ഫോയാണ്. വാട്ട്സാപ്പിന്‍റെ 23.4.0.72 ഐഒഎസ് ബീറ്റ പതിപ്പിലാണ് ഈ പുതിയ ഫീച്ചര്‍ ഉള്ളതെന്നാണ് ഇവര്‍ പറയുന്നത്. ബീറ്റ പരീക്ഷണങ്ങള്‍ക്ക് ശേഷം അധികം വൈകാതെ ഈ ഫീച്ചര്‍ എല്ലാവരിലും എത്തും. ജനപ്രിയ മെസേജിങ് ആപ്ലിക്കേഷനാണ് വാട്ട്സാപ്പ്. ഏകദേശം 200 കോടിയിലേറെ ഉപഭോക്താക്കളുണ്ട് ആപ്പിന്. നിരന്തരം അപ്‌ഡേറ്റുകള്‍ എത്തിക്കൊണ്ടിരിക്കുന്ന ആപ്ലിക്കേഷനുകളില്‍ ഒന്ന് കൂടിയാണിത്.
കഴിഞ്ഞ ദിവസമാണ് ഒരേ സമയം 100 ഓളം ഇമേജുകള്‍ ഷെയര്‍ ചെയ്യാനുള്ള ഓപ്ഷനുമായി വാട്ട്സാപ്പ് എത്തിയത്. ഡെസ്ക്ടോപ്പ് പതിപ്പിലാണ് ഈ ഫീച്ചര്‍ ലഭ്യമായിത്തുടങ്ങിയിരിക്കുന്നത്.ഹൈക്വാളിറ്റി ഇമേജുകള്‍ ഷെയര്‍ ചെയ്യാനുള്ള ഓപ്ഷനാണ് വാട്ട്സാപ്പ് അവതരിപ്പിക്കുന്നത്. കമ്ബനി അതിന്റെ ആന്‍ഡ്രോയിഡ്, ഐഒഎസ് ആപ്പുകള്‍ക്കായി സമാനമായ ഒരു അപ്‌ഡേറ്റില്‍ പ്രവര്‍ത്തിക്കുന്നുണ്ടെന്ന് നേരത്തെ റിപ്പോര്‍ട്ടുകള്‍ വന്നിരുന്നു.
ഐഒഎസിനായി വാട്ട്സ്ആപ്പ് ബീറ്റ പതിപ്പ് 23.3.0.75 പുറത്തിറക്കുകയാണെന്ന് ഫീച്ചര്‍ ട്രാക്കറായ വാബെറ്റ്‌ഇന്‍ഫോ റിപ്പോര്‍ട്ട് ചെയ്തിരുന്നു. ഒരു ചാറ്റില്‍ ഒരേ സമയം 30 മീഡിയ ഫയലുകള്‍ വരെ പങ്കിടാനേ നിലവില്‍ ആപ്പ് അനുവദിക്കൂ. ഇതിനാണ് മാറ്റം വരുന്നത്. ചില വാട്ട്സ്ആപ്പ് ബീറ്റ ടെസ്റ്ററുകളില്‍ ഉയര്‍ന്ന എണ്ണം ഫയല്‍ ഷെയറിങ് ഫീച്ചര്‍ ഇപ്പോള്‍ ലഭ്യമാണ്.
മാത്രമല്ല ഇത് മറ്റ് ഉപയോക്താക്കള്‍ക്ക് ഉടന്‍ ലഭ്യമാക്കിയേക്കും. പുതിയ അപ്ഡേറ്റ് അനുസരിച്ച്‌ അയയ്‌ക്കേണ്ട ഫോട്ടോകളുടെ ക്വാളിറ്റി തിരഞ്ഞെടുക്കാന്‍ ഉപയോക്താക്കള്‍ക്ക് കഴിയും. കൂടാതെ, ഫീച്ചര്‍ ട്രാക്കര്‍ അനുസരിച്ച്‌ ഉപയോക്താക്കള്‍ക്ക് ഓട്ടോമാറ്റിക്, മികച്ച നിലവാരം, ഡാറ്റ സേവര്‍ ഓപ്ഷനുകളില്‍ നിന്നും തിരഞ്ഞെടുക്കാം.നേരത്തെ സ്റ്റാറ്റസില്‍ പുതിയ അപ്ഡേറ്റുമായി ആപ്പ് എത്തിയിരുന്നു.
വോയ്‌സ് സ്റ്റാറ്റസിലേക്കുള്ള പ്രൈവസി സെറ്റിങ്സ്, സ്റ്റാറ്റസുകള്‍ക്ക് റിപ്ലൈ ആയി നല്കുന്ന ഇമോജി റിയാക്ഷനുകള്‍, സ്റ്റാറ്റസ് അപ്‌ഡേറ്റുകളിലെ ലിങ്ക് പ്രിവ്യൂകള്‍ എന്നിവ ഉള്‍പ്പെട്ടതാണ് പുതിയ അപ്ഡേറ്റ്. വരും ആഴ്ചകളില്‍ ഈ ഫീച്ചറുകള്‍ ഉപയോക്താക്കള്‍ക്ക് ലഭ്യമാക്കുമെന്ന് കമ്ബനി അറിയിച്ചു.
