വയനാട് ദുരന്തം; പ്രത്യേക പാക്കേജാണ് കേന്ദ്ര സര്ക്കാര് പ്രഖ്യാപിക്കേണ്ടത്: വിഡി സതീശൻ
വയനാട് ഉരുൾപൊട്ടൽ ദുരന്ത രക്ഷാ പ്രവർത്തനത്തിൽ സൈന്യത്തിന്റെയും എന്ഡിആര്എഫിന്റെയും സാന്നിധ്യം ഒഴിച്ചാല് കേന്ദ്രസർക്കാരിന്റെ ഒരു സഹായവും ഉണ്ടായിട്ടില്ലെന്ന് പ്രതിപക്ഷ നേതാവ് വി ഡി സതീശൻ. കേന്ദ്രം സാമ്പത്തികമായി സഹായിക്കാന് തയാറാകണമെന്ന് അദ്ദേഹം ആവശ്യപ്പെട്ടു .
വയനാട് ദുരന്ത ഇരകളുടെ പുനരധിവാസ പ്രക്രിയയ്ക്കും അപകടത്തിന്റെ ആഘാതം കുറയ്ക്കുന്നതിനും വേണ്ടിയുള്ള പ്രത്യേക പാക്കേജാണ് കേന്ദ്ര സര്ക്കാര് പ്രഖ്യാപിക്കേണ്ടത്. ഭാവിയില് ഇതുപ്പോലെയുള്ള അപകടങ്ങള് ഉണ്ടാകാതിരിക്കാനുള്ള വാണിങ് സിസ്റ്റം വയനാട് ഉള്പ്പെടെ സംസ്ഥാനത്താകെ പ്രയോജനപ്പെടുത്തണം.
കാലാവസ്ഥാ വ്യതിയാനത്തിന്റെ ഏറ്റവും വലിയ ഇരയായി മാറിക്കൊണ്ടിരിക്കുന്ന സംസ്ഥാനമാണ് കേരളം. പ്രകൃതി ദുരന്തങ്ങളുടെ ആഘാതം കുറയ്ക്കാനും മനുഷ്യനെ അവിടെ നിന്നും മാറ്റാനും സാധിക്കണം. ലോകത്ത് എല്ലായിടത്തുമുള്ള ഈ സംവിധാനങ്ങള് കേരളത്തിലും ഉണ്ടാകണം. കേന്ദ്ര- സംസ്ഥാന വകുപ്പുകള് സംയോജിച്ച് ലോക നിലവാരമുള്ള വാണിങ് സിസ്റ്റവും ഇവാക്യുവേഷന് സിസ്റ്റവും സ്ഥാപിക്കണം.
ഇനി ഇതുപോലെ ദുരന്തം ഉണ്ടാകാന് പാടില്ല. അതിനായാണ് കേന്ദ്ര സഹായം നല്കേണ്ടത്. പ്രധാനമന്ത്രി വയനാട് സന്ദര്ശിച്ച് മടങ്ങിയാല് പ്രത്യേക പാക്കേജ് പ്രഖ്യാപിക്കുമെന്ന ശുഭാപ്തി വിശ്വാസമാണ് യുഡിഎഫിനുള്ളത്. രാഹുല് ഗാന്ധി ഉള്പ്പെടെയുള്ള എംപിമാര് കേരളത്തിന് പ്രത്യേക പാക്കേജ് പ്രഖ്യാപിക്കണമെന്ന് ആവശ്യപ്പെട്ടിട്ടുണ്ടെന്നും സതീശൻ പറഞ്ഞു.
അതെപ്പോലെ തന്നെ , വയനാട് അപകടം നടക്കുന്നതിന് രണ്ടാഴ്ച മുന്പ് നടന്ന നിയമസഭ സമ്മേളനത്തിലും അപകടകരമായ കാലാവസ്ഥാ വ്യതിയാനം പ്രതിപക്ഷം ചൂണ്ടിക്കാട്ടിയതാണ്. ഏത് നയരൂപീകരണം നടത്തിയാലും അതിന്റെ പ്രധാനഘടകം കാലാവസ്ഥാ വ്യതിയാനമായിരിക്കണമെന്നും ആവശ്യപ്പെട്ടതാണ്. പശ്ചിമഘട്ടത്തിലെ ക്വാറികള്ക്കും നിയന്ത്രണം വേണം. അല്ലാതെ കര്ഷകരല്ല പശ്ചിമഘട്ടത്തെ ദ്രോഹിക്കുന്നതെന്നും പ്രതിപക്ഷ നേതാവ് കൂട്ടിച്ചേര്ത്തു.