കോളേജ് ശുചിമുറിയിൽ വിദ്യാർത്ഥിനിയുടെ വീഡിയോ പകർത്തി; കർണാടകയിൽ 3 പെൺകുട്ടികൾക്കെതിരെ കേസെടുത്തു
ഉഡുപ്പിയിലെ ഒരു പാരാമെഡിക്കൽ കോളേജിലെ മൂന്ന് പെൺകുട്ടികൾക്കെതിരെ അടുത്തിടെ കോളേജ് ശുചിമുറിയിൽ വെച്ച് സഹ വിദ്യാർത്ഥിയുടെ വീഡിയോ പകർത്തിയതിന്റെ പേരിൽ എഫ്‌ഐആർ രജിസ്റ്റർ ചെയ്തതായി പോലീസ് വൃത്തങ്ങൾ അറിയിച്ചു. ഉഡുപ്പിയിലെ മാൽപെ പോലീസ് സ്‌റ്റേഷനിലാണ് എഫ്‌ഐആർ ഫയൽ ചെയ്തിരിക്കുന്നത്. ഷബ്‌നാസ്, അൽഫിയ, അലീമ എന്നീ മൂന്ന് വിദ്യാർത്ഥിനികളെയാണ് എഫ്‌ഐആറിൽ ഉൾപ്പെടുത്തിയിരിക്കുന്നത്.
ഐടി ആക്ടിലെ സെക്ഷൻ 509, 204, 175, 34, 66 (ഇ) വകുപ്പുകൾ പ്രകാരം ഫയൽ ചെയ്ത എഫ്‌ഐആറിൽ കോളേജ് അഡ്മിനിസ്ട്രേഷന്റെ പേരും രേഖപ്പെടുത്തിയിട്ടുണ്ടെന്ന് വൃത്തങ്ങൾ അറിയിച്ചു. നേത്ര ജ്യോതി ഇൻസ്റ്റിറ്റ്യൂട്ട് ഓഫ് അലൈഡ് ഹെൽത്ത് സയൻസസിലെ ശുചിമുറിയിൽ വീഡിയോ റെക്കോർഡ് ചെയ്തതുമായി ബന്ധപ്പെട്ട് രണ്ട് വ്യത്യസ്ത സ്വമേധയാ കേസുകൾ രജിസ്റ്റർ ചെയ്തിട്ടുണ്ടെന്ന് പോലീസ് പ്രസ്താവനയിൽ പറഞ്ഞു.
ഒരു വിദ്യാർത്ഥിനിയുടെ സ്വകാര്യ വീഡിയോ പകർത്തി പിന്നീട് ഡിലീറ്റ് ചെയ്തതിന് മൂന്ന് വിദ്യാർത്ഥിനികൾക്കും കോളേജ് അഡ്മിനിസ്ട്രേഷനുമെതിരേ കേസെടുത്തു. സംഭവവുമായി ബന്ധപ്പെട്ട വിശദാംശങ്ങളും തെളിവുകളും ഹാജരാക്കുന്നതിൽ വീഴ്ച വരുത്തിയതിന് ഇരയുടെ സൽപ്പേര് നശിപ്പിച്ചേക്കുമെന്ന കുറ്റമാണ് പൊലീസ് ഇവർക്കെതിരെ ചുമത്തിയിരിക്കുന്നത്.
സംഭവത്തിന്റെ മോർഫ് ചെയ്ത വീഡിയോ വൺ ഇന്ത്യ കന്നഡ യൂട്യൂബ് ചാനലിൽ അപ്‌ലോഡ് ചെയ്‌തെന്നാണ് ആരോപണം. കാലു സിംഗ് ചവാൻ എന്ന വ്യക്തി തന്റെ ട്വിറ്റർ അക്കൗണ്ടിലും ഇത് പോസ്റ്റ് ചെയ്തിട്ടുണ്ട്. സാമുദായിക ശത്രുതയുണ്ടാക്കുന്നതിനും സാമൂഹിക സൗഹാർദം തകർക്കുന്നതിനും കേസെടുത്തിട്ടുണ്ടെന്നും പ്രസ്താവനയിൽ പറയുന്നു.
അടുത്തിടെ കോളേജിലെ ശുചിമുറിയിൽ വെച്ച് വീഡിയോ ചിത്രീകരിച്ചുവെന്നാരോപിച്ച് മൂന്ന് വിദ്യാർത്ഥിനികളെ കോളേജിൽ നിന്ന് സസ്പെൻഡ് ചെയ്തിരുന്നു. അതേസമയം, ഹിന്ദു പെൺകുട്ടിയെ ചിത്രീകരിച്ച മൂന്ന് മുസ്ലീം വിദ്യാർത്ഥികളെ അറസ്റ്റ് ചെയ്യണമെന്ന് ആവശ്യപ്പെട്ട് ബിജെപി വ്യാഴാഴ്ച സംസ്ഥാന വ്യാപകമായി പ്രതിഷേധം പ്രഖ്യാപിച്ചതോടെ വിഷയം രാഷ്ട്രീയ വൃത്തങ്ങളിൽ കോളിളക്കം സൃഷ്ടിച്ചു.
