മലയാളം സർവകലാശാല യൂണിയൻ തെരഞ്ഞടുപ്പിൽ എസ്എഫ്ഐക്ക് വിജയം
തിരൂർ മലയാളം സർവകലാശാല യൂണിയനിലേക്ക് നടന്ന തെരഞ്ഞടുപ്പിൽ എം എസ് എഫിനെ പരാജയപ്പെടുത്തി എസ്എഫ്ഐക്ക് ജയം. മുൻപ് ഇവിടെ നടന്ന തെരഞ്ഞടുപ്പിൽ എസ്എഫ്ഐയുടെ ജയം ഹൈക്കോടതി റദ്ദാക്കിയിരുന്നു. എംഎസ്എഫ് പ്രവർത്തകർ നൽകിയ ഹർജിയിലാണ് വീണ്ടും തെരഞ്ഞടുപ്പ് നടത്തിയത്.
കാമ്പസിലെ ചെയർപേഴ്‌സൺ, ജനറൽ സെക്രട്ടറി, ജനറൽ ക്യാപ്റ്റൻ തുടങ്ങിയ സീറ്റുകളിലേക്കായിരുന്നു ഇലക്ഷൻ നടന്നത്. ആദ്യം നടന്ന മലയാളം സർവകലാശാല യൂണിയൻ ആൻഡ് സെനറ്റ് തെരഞ്ഞെടുപ്പിൽ എംഎസ്എഫ് സ്ഥാനാർഥികൾ നൽകിയ ഹർജിയിൽ എസ്എഫ്ഐ എതിരില്ലാതെ ജയിച്ചത് ഹൈക്കോടതി റദ്ദാക്കിയിരുന്നു.
തുടർന്ന് രണ്ടാഴ്ചക്കുള്ളിൽ വീണ്ടും തെരഞ്ഞെടുപ്പ് നടത്തണമെന്ന് കോടതി നിർദേശിച്ചു. ഒരാഴ്ചക്കകം സ്ഥാനാർഥി പട്ടിക പ്രസിദ്ധീകരിക്കണമെന്നുമായിരുന്നു കോടതി ഉത്തരവ്. നിയമവിരുദ്ധമായാണ് സൂക്ഷ്മ പരിശോധന നടത്തി നാമ നിര്‍ദേശ പത്രിക തള്ളിയതെന്നും ഈ സാഹചര്യത്തില്‍ തെരഞ്ഞെടുപ്പ് വീണ്ടും നടത്തണമെന്നായിരുന്നു ഹര്‍ജിയിലെ ആവശ്യം. ഈ ആവശ്യം പരിഗണിച്ചുകൊണ്ടാണ് ഹൈക്കോടതി നടപടി.
