എല്ഡിഎഫിന്റെ സിറ്റിങ് സീറ്റ് പിടിച്ചെടുത്ത് റിജില് മാക്കുറ്റി
13 December 2025
കണ്ണൂർ കോര്പ്പറേഷനിലെ എല്ഡിഎഫിന്റെ സിറ്റിങ് സീറ്റ് പിടിച്ചെടുത്ത് മുന് യൂത്ത് കോണ്ഗ്രസ് സംസ്ഥാന വൈസ് പ്രസിഡന്റും കെപിസിസി അംഗവുമായ റിജില് മാക്കുറ്റി. ആദികടലായി ഡിവിഷനില് 713 വോട്ടുകള്ക്കാണ് റിജില് വിജയിച്ചത്.
ഇടതുപക്ഷം കഴിഞ്ഞ രണ്ട് തവണയും ഭരിച്ചിരുന്ന ഡിവിഷനാണ് ഇത്തവണ യുഡിഎഫിന് കിട്ടിയിരിക്കുന്നത്. റിജില് മാക്കുറ്റി 1404 വോട്ടുകള് നേടിയപ്പോള് എല്ഡിഎഫിന്റെ എം കെ ഷാജി നേടിയത് 691 വോട്ടുകളാണ്. റിജില് മാക്കുറ്റിക്കെതിരെ ശക്തമായ പ്രചരണമായിരുന്നു എല്ഡിഎഫ് നടത്തിയത്.
യുഡിഎഫ് പരിപാടിയില് മുഖ്യമന്ത്രി പിണറായി വിജയനെതിരെ പ്രസംഗിച്ചെന്ന് ആരോപിച്ച് നാദാപുരത്ത് വെച്ച് റിജില് മാക്കുറ്റിക്കെതിരെ ഡിവൈഎഫ്ഐ കൊലവിളി പ്രകടനം നടത്തിയിരുന്നു. ചാനല് ചര്ച്ചകളിലെ കോണ്ഗ്രസ് മുഖമായാണ് റിജില് പൊതുശ്രദ്ധ നേടിയത്.
