ഏകമകന്റെ വേർപാടിൽ മനംനൊന്ത് ദമ്പതികൾ ജീവനൊടുക്കി: മകൻ മരിച്ചത് വേടന്റെ പരിപാടിക്കിടെയുണ്ടായ തിരക്കിൽ ട്രെയിൻ തട്ടി
കാസര്കോട് ജില്ലയിലെ പൊയ്നാച്ചി പറമ്പിൽ ദമ്പതികളെ വീടിനുള്ളില് മരിച്ച നിലയില് കണ്ടെത്തി. വേണുഗോപാല്, ഭാര്യ സ്മിത എന്നിവരാണ് മരിച്ചത്. മുന്പ് ഇവരുടെ മകന് ബേക്കലില് വേടന്റെ പരിപാടിക്കിടെ ട്രെയിന് തട്ടി മരിച്ചിരുന്നു.
മകന്റെ മരണത്തിന് പിന്നാലെ ഉണ്ടായ മാനസിക വിഷമമാണ് ഇവരെ ആത്മഹത്യയിലേക്ക് നയിച്ചത്. ഡിസംബര് 29നാണ് ശിവാനന്ദ് ട്രെയിന് തട്ടി മരിച്ചത്. വീട്ടില് നിന്ന് കണ്ടെടുത്ത ആത്മഹത്യാക്കുറിപ്പില് ഇക്കാര്യം സ്ഥിരീകരിക്കുന്നുണ്ട്. ബേക്കൽ ബീച്ച് ഫെസ്റ്റിൽ വേടന്റെ സംഗീതപരിപാടിക്കിടെ ഉണ്ടായ തിക്കിനും തിരക്കിനും പിന്നാലെ തൊട്ടടുത്ത റെയിൽവേ ട്രാക്കിൽ വച്ച് ട്രെയിൻ തട്ടിയായിരുന്നു ഇവരുടെ മകൻ ശിവാനന്ദ് മരിച്ചത്.
മംഗളൂരു ഭാഗത്തേക്കു പോകുകയായിരുന്ന തിരുനെൽവേലി ജാംനഗർ എക്സ്പ്രസ് ഇടിച്ചെന്നായിരുന്നു പുറത്തുവന്ന വിവരം. രാത്രി പത്തോടെ ഇതുവഴി പോയ ട്രെയിനിലെ ലോക്കോപൈലറ്റായിരുന്നു മൃതദേഹം കണ്ടത്.
