ഷാര്ജയിൽ റെസിഡന്ഷ്യല് ടവറില് വന്തീപിടുത്തം; 12 പേർക്ക് പരിക്കേറ്റു
6 May 2020
ഷാർജയിൽ ടവറിന് തീപിടിച്ച് 12 പേർക്ക് പരിക്കേറ്റു. കഴിഞ്ഞ ദിവസം രാത്രി അല് നഹ്ദയിലെ റെസിഡന്ഷ്യല് ടവറിലാണ് തീപിടിത്തമുണ്ടായത്. പരിക്കേറ്റവരിൽ അഞ്ചു പേരെ പുക ശ്വസിച്ചതിനെ തുടര്ന്നുണ്ടായ അസ്വസ്ഥതകളെ തുടര്ന്ന് ആശുപത്രിയില് പ്രവേശിപ്പിച്ചിരിക്കുകയാണ്.
അബ്കോ ടവറിന്റെ പത്താം നിലയിലാണ് ആദ്യം തീ പടര്ന്നത്. പിന്നീട് മുകളിലേക്ക് തീ പടരുകയായിരുന്നു. 49 നില കെട്ടിടത്തിലാണ് തീപിടുത്തമുണ്ടായത്. ഇതില് 38 നിലകളില് താമസക്കാരുണ്ട്. ഇവരെ ഉടന് തന്നെ അധികൃതര് ഒഴിപ്പിച്ചിരുന്നു. തൊട്ടടുത്തുള്ള കെട്ടിടത്തിലേക്കും തീ പടര്ന്നിരുന്നു.
ഷാര്ജ സിവില് ഡിഫന്സിന്റെ ദ്രുതഗതിയിലുള്ള ഇടപെടല് മൂലമാണ് വന്ദുരന്തം ഒഴിവായത്. അതേസമയം തീപിടുത്തത്തിന്റെ കാരണം ഇതുവരെ വ്യക്തമായിട്ടില്ല.രണ്ടു മണിക്കൂറോളം എടുത്താണ് തീ നിയന്ത്രണവിധേയമാക്കാന് സാധിച്ചത്.